«Զանգեզուրի միջանցքի» 42 կիլոմետրանոց հատվածում աշխատանքներին մասնակցում են մեր գործընկերները ԱՄՆ-ից. Հիքմեթ Հաջիև

Միջին միջանցքով բեռնափոխադրումները, կանխատեսումների համաձայն, կավելանան ավելի քան 50 միլիոն տոննայով։

Այս մասին հայտարարել է Ադրբեջանի նախագահի օգնական և նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը՝ ելույթ ունենալով Նյու Յորքում կայացած «Միջին միջանցքով. հաղորդակցություն, ֆինանսներ և էներգետիկա» 6-րդ կասպիական բիզնես ֆորումում, որը կազմակերպվել էր Կասպիական քաղաքականության կենտրոնի կողմից։

Նրա խոսքով՝ Ադրբեջանը լրացուցիչ միջոցներ է ներդնում այս նպատակով. «Բաքվի նավահանգստի բեռնափոխադրման հզորությունը տարեկան 25 միլիոն տոննա է, և աշխատանքներ են տարվում այդ հզորությունը ընդլայնելու ուղղությամբ», - հավելել է Հիքմեթ Հաջիևը։ Նա նշել է, որ Բաքվից մինչև օկուպացված Արցախի Մեխակավան և Հայաստանի հետ սահման երկաթուղու նախագիծը սկսվել է 2020 թվականին և նախատեսվում է ավարտել մինչև 2026 թվականի կեսերը։

«Աշխատանքներ են ընթանում նաև Զանգեզուրի միջանցքի 42 կիլոմետրանոց հատվածում, որը գտնվում է Հայաստանում։ Մասնակցում են մեր գործընկերները Միացյալ Նահանգներից։ Երրորդ հատվածը ներառում է Նախիջևանը։ Այստեղ լրացուցիչ ներդրումներ են կատարվում, և մենք հրավիրում ենք այլ միջազգային գործընկերների, այդ թվում՝ եվրոպական երկրների, համագործակցության։ Հիմնական նպատակը Հարավային Կովկասը համագործակցության տարածքի վերածելն է», - ասել է Ադրբեջանի նախագահի օգնականը։