Արփինե Սարգսյանը չի տիրապետում կառույցին․ նա պետք է հրաժարական տա

Կեսգիշերին զինված հարձակում է տեղի ունեցել Փարաքար համայնքի ղեկավար Վալոդյա Գրիգորյանի վրա, ինչի հետևանքով սպանվել են նա և նրա ընկերը, ով ոստիկանության աշխատակից էր, սակայն այդ պահին ծառայության մեջ գտնվելիս չի եղել։ Եվս մեկ քաղաքացի գտնվում է ծայրահեղ ծանր վիճակում։

Հարկ է նկատել, որ Գրիգորյանին գնդակահարել են իր տան բակում։ Սա կարելի է որակել լկտի հարձակում։

Թե ինչու և ում կողմից իրականացվեց սպանությունը, թերևս կպարզվի քննության արդյունքում, բայց այն, որ այս հանցագործությունը կանխատեսել ու կանխել հնարավոր էր՝ ակնհայտ է։

Մերձավանում բոլորը գիտեին՝ ներկա ու նախկին իշխանությունների և նրանց համախոհների միջև անհաշտություն կար։ Իսկ ավելի կոնկրետ՝ լարվածություն։

Շատերի հիշողության մեջ գուցե դեռ մնացել է, որ Փարաքարի նախընտրական փուլում՝ փետրվարի 5-ին, Մերձավանում հնչել էին կրակոցներ, սպանվել էր մեկ անձ (սպանվածը 30-ամյա Գրիգոր Օհանյան էր)։

Մինչև կրակոցները, եղել էր նաև ծեծկռտուք։ Այն ժամանակ սլաքներն ուղղում էին Վալոդյա Գրիգորյանի եղբոր և նրա մտերիմների դեմ։

Հիշեցման կարգով նշենք նաև, որ, ըստ քննչական կոմիտեի վերջին տվյալների, հանրային քրեական հետապնդում է հարուցվել 12 անձի նկատմամբ, որից 6-ի նկատմամբ կիրառվել է կալանք, 3-ի նկատմամբ՝ տնային կալանք, 3-ի նկատմամբ՝ բացակայելու արգելք խափանման միջոցներ:

Այս կրակոցներից 2 ամիս անց, համայնքում եղան ընտրություններ, որի արդյուքնում համայնքապետ ընտրվեց «Ապրելու երկիր» ընդդիմադիր կուսակցության անդամ Վալոդյա Գրիգորյանը (2025թ-ի ապրիլի 19-ին ստանձնել է Փարաքար համայնքի ղեկավարի լիազորությունները):

Ընդդիմադիր գործչի ընտրվելու փաստը ոչ միայն Մերձավանում, այլև, ընդհանրապես, իշխանության ներսում ավելի սրեց նախկինների-ներկաների թիմակիցների լարվածությունը։

Իհարկե, մենք չենք պնդում, որ այս երկու սպանություններն անմիջական կապ ունեն մեկը մյուսի հետ, բայց նաև չի բացառվում, որ այս սպանությունը պարզապես վենդետա էր։

Թեև ՆԳՆ խոսնակ Նարեկ Սարգսյանը, միջադեպի մասին պարզաբանում տալիս, նշեց, թե իբր այդ սպանությունից հետո Փարաքարում հսկողություն է իրականացվել, սակայն, եթե դա իսկապես լիներ, ապա այսօր, հավանաբար, չէինք ունենա այս միջադեպը։

Անգամ շարքային քաղաքացուն է պարզ, որ ՆԳՆ-ն պետք է կանխարգելիչ միջոցառումներ ձեռնարկեր տվյալ համայնքում՝ հնարավոր բռնությունները բացառելու համար․ ինչու՞ այդ գործողությունները չեն ձեռնարկվել, ինչու՞ ոչինչ չի ձեռնարկվել․․․

Ներքին գործերի նախարար Արփինե Սարգսյանը չգիտե՞ր նախկինում տեղի ունեցած միջադեպի, համայնքում տիրող ներքին լարվածության ու հնարավոր միջադեպերի մասին։ Եթե գիտեր ու ոչինչ չի ձեռնարկել, ուրեմն ՆԳ նախարար կոչվելու իրավունք չունի, իսկ եթե չգիտեր, ուրեմն առավել ևս այս նախարարուհին իր տեղում չէ։

Երբ ներքին գործերի նախարարը չի տիրապետում կառույցին, ապա քաղաքացին իրեն անվտանգ չի կարող զգալ։ Այս պարագայում անհրաժեշտ է ոչ միայն դեպքի արագ բացահայտում, այլև Արփինե Սարգսյանը պետք է հրաժարական տա։