ՆԳՆ նախարարն ու ոստիկանության բարձրաստիճան ղեկավարությունը պետք է անմիջապես հրաժարական տան․ կալանքի տակ գտնվող Արտակ Սարգսյան

«ՔՈՉԱՐԻ ազգային վերածնունդ և ազգի զարթոնք» կուսակցությունը պաշտոնական հայտարարություն է տարածել, որում մասնավորապես ասվում է․

 

«Փարաքարի համայնքապետ Վալոդյա Գրիգորյանի դաժան սպանությունը և նրա ընկերոջ գնդակահարությունը ևս մեկ անգամ ապացուցեցին, որ Հայաստանի իշխանական համակարգը, ներառյալ ՆԳՆ-ն, ոստիկանությունը և ԱԱԾ-ն, չեն ծառայում ժողովրդի շահերին։

 

Արդեն պարզ է դարձել, որ ոստիկանության այն բաժինները, որոնք պարտավոր էին կանխել հանցագործությունները և իրականացնել բացատրական աշխատանք հասարակության հետ, պարզապես գոյություն չունեն։ Այդ կառույցները միայն արձանագրում են կատարվածը, բայց երբեք չեն կանխում այն։

Միևնույն ժամանակ՝ մենք տեսել ենք, որ խաղաղ ցույցերի բռնաճնշման և ապօրինի ձերբակալությունների գործում այդ նույն կառույցները երբեք չեն ձախողվել։ Երբ ժողովուրդը պահանջել է արդարություն, ոստիկանությունը և ԱԱԾ-ն գործել են անմիջապես ու կոշտորեն։ Բայց երբ խոսքը վերաբերում է մեր քաղաքացիների կյանքի պաշտպանությանը՝ նրանք լռում են և թաքնվում։

 

Այսօր Հայաստանում հանցագործությունների մակարդակը մեզ դասում է հետամնաց երկրների շարքը։ Սպանությունները դարձել են առօրյա, և քաղաքացիներն այլևս վստահ չեն, որ կվերադառնան տուն։ Սա՞ է Փաշինյանի գովազդած «ժողովրդավարության բաստիոնը»։ Սա՞ է նրա խոստացած «Չորրորդ Հանրապետությունը»։ Եթե այո, ապա այդ բաստիոնը փլատակ է, իսկ հանրապետությունը՝ անպատժելիության ու բռնության միջավայր։

«ՔՈՉԱՐԻ ազգային վերածնունդ և ազգի զարթոնք» կուսակցությունը հայտարարում է․

 

ՆԳՆ նախարարն ու ոստիկանության բարձրաստիճան ղեկավարությունը պետք է անմիջապես հրաժարական տան, քանի որ չեն պաշտպանում ժողովրդի կյանքն ու անվտանգությունը։

 

ԱԱԾ տնօրենը, որը զբաղված է խաղաղ քաղաքացիների վրա ճնշում գործադրելով, բայց աչք է փակում երկրի ներսում կատարվող հանցագործությունների վրա, պետք է հեռանա պաշտոնից։

 

Մեր ժողովուրդը հարկերով չի պարտավոր պահել մի համակարգ, որը ծառայում է իշխանության աթոռին, այլ ոչ թե քաղաքացիների անվտանգությանը։

Մենք վճարում ենք հարկեր ոչ թե մեր համայնքապետերի դիակները տեսնելու, ոչ թե սպանված քաղաքացիների ու անպատժելիության շքերթ դիտելու համար, այլ ապահովված և պաշտպանված լինելու համար։

 

Հայաստանի ժողովուրդը պահանջում է․ անվտանգության պատասխանատուները, որոնք ձախողել են իրենց պարտականությունները, թողնեն իրենց պաշտոնները և պատասխան տան հասարակության առաջ։

---

Հարգանքներով,

«ՔՈՉԱՐԻ ազգային վերածնունդ և ազգի զարթոնք» կուսակցության վարչություն