Ողջունելի չէ «Հայաստան» խմբակցության այն մոտեցումը, որ մենք ստորագրությունները տվեցինք, դե գնացեք ու ինչ ուզում եք, արեք. Միհրան Հակոբյան

«Մենք գործ ունենք հակառակորդի հետ, որին պետք է ժամ առաջ, րոպե առաջ ուղղակի իշխանազերծել։ Սա օրհասական խնդիր է մեր բոլորի համար», -ԱԺ-ում «Պատիվ ունեմ» խմբակցության հրավիրած «Ազգային ճգնաժամի և կառավարման ձախողման մասին» ԱԺ հայտարարության նախագծի քննարկմանը հայտարարեց Պատմական գիտությունների թեկնածու Միհրան Հակոբյանը։

Նա նշեց, որ իմպիչմենտն այս իշխանության ազգադավ, հակապետական, խայտառակ քաղաքականությունը կասեցնելու մասին է։  

«Անկախ իմպիչմենտի վերջնարդյունքից, գործընթացը կստացվի, թե չի ստացվի, այդ գործընթացը պետք էր  սկսել դեռևս 2021 թվականից ամիսը 7 անգամ։ Ինչի մասին է  խոսքը։  Անվստահության»,- ասա Մ. Հակոբյանը․

Նա ողջունեց այն հանգամանքը, որ ընդդիմադիր «Հայաստան» խմբակցությունը միացել է «Պատիվ ունեմ»-ի նախաձեռնությանը. «Փաշինյանին անվստահություն հայտնելու գործընթացը նոր կյանք ստանալու հնարավորություն ունի։

Միաժամանակ ողջունելի չէ գործընկերների այն մոտեցումը, որ մենք ստորագրությունները տվեցինք, դե գնացեք  ու ինչ ուզում եք արեք։ Ոչ, եթե Փաշինյանը  2021  թվականին խաբել է Հայաստանի ընտրողին, պակաս չի խաբել նաև ընդդիմությունը։ Ընդդիմությունը եկել է Նիկոլ Փաշինյանին փոխելու խոստումներով ու չի կարողացել փոխել։ Հիմա պարտավոր է  դրա համար կրել քաղաքական պատասխանատվություն»։

Հիշեցնենք, որ լսումների ընթացքում «Հայաստան» խմբակցության պատգամավոր Իշխան Սաղաթելյանը հայտարարել է. «Ես մեր խմբակցության պատգամավորների 3 ամիս առաջ ստորագրված ստորագրությունները կփոխանցեմ «Պատիվ ունեմ» խմբակցությանը՝ կցելու այդ գործընթացին, ֆիքսելու, որ մեր ստորագրություններ կային ինչպես երեք ամիս առաջ, այնպես էլ հիմա։ Եթե դա չբավարարի ու ֆիքսվի, որ դա տեխնիկական խնդիր է, այս  ստորագրությունները կտեղափոխվեն նաև այն  ձևաթղթի տակ, որը ներկայացնում է «Պատիվ ունեմ» խմբակցությունը»»։ 

Վարչապետին անվստահություն հայտնելու մասին Ազգային ժողովի որոշման նախագիծ կարող է ներկայացնել առնվազն 36 պատգամավոր։ Ընդդիմադիր «Պատիվ ունեմ» խմբակցությունն ունի 6 ձայն, իսկ «Հայաստան» խմբակցությունը՝ 28 ձայն, ընդհանուր առմամբ՝ 34 ձայն։ Որպեսզի նախագիծն ընդունվի, 54 պատգամավոր պետք է կողմ քվեարկի, այսինքն՝ առնվազն 20 իշխանական պատգամավոր պետք է միանա ընդդիմության նախաձեռնությանը:

 ՀՀ Սահմանդրության 115 հոդվածը վերաբերում է վարչապետին անվստահություն հայտնելուն։ Այն սահմանում է.

1. Վարչապետին անվստահություն հայտնելու մասին Ազգային ժողովի որոշման նախագիծ կարող է ներկայացնել պատգամավորների ընդհանուր թվի առնվազն մեկ երրորդը միայն այն դեպքում, եթե որոշման նախագծով միաժամանակ առաջարկվում է նոր վարչապետի թեկնածու:

2. Վարչապետին անվստահություն հայտնելու մասին Ազգային ժողովի որոշման նախագիծը քվեարկության է դրվում այն ներկայացվելուց ոչ շուտ, քան քառասունութ, և ոչ ուշ, քան յոթանասուներկու ժամ հետո: Որոշումն ընդունվում է պատգամավորների ընդհանուր թվի ձայների մեծամասնությամբ՝ անվանական քվեարկությամբ: Որոշման ընդունման դեպքում համարվում է, որ վարչապետը հրաժարական է ներկայացրել: Այս դեպքում Սահմանադրության 149-րդ հոդվածի 2-4-րդ մասերի դրույթները կիրառելի չեն:

3. Վարչապետին անվստահություն կարելի է հայտնել նրա նշանակումից ոչ շուտ, քան մեկ տարի հետո: Եթե վարչապետին անվստահություն հայտնելու մասին Ազգային ժողովի որոշման նախագիծը չի ընդունվում, ապա նման նախագիծ կարող է ներկայացվել ոչ շուտ, քան վեց ամիս հետո