Եղվարդը` կրկնվող հանցագործությունների կենտրոն. Չխկո մականունով երիտասարդին 3 անգամ ծեծի են ենթարկել, ոստիկանությունն իբրև թե անտեղյակ` ոչ մի քայլ չի ձեռնարկում

Երկրում մոլեգնող զենքով հանցագործությունների կտրուկ աճի ֆոնին, NEWSPRESS.am-ն ահազանգ է ստացել, որ Մերձավանում տեղի ունեցածի սցենարը կարող է կրկնվել Կոտայքում: 

Օրեր առաջ Եղվարդ քաղաքում տեղի է ունեցել ծեծկռտուք, որի մասնակիցներն են եղել նախկինում այլ քրեական գործերով անցնող ոմն Գետոյի տղերքը (անունները հայտնի չեն), ովքեր վերջերս դաժանաբար ծեծի են ենթարկել Եղվարդի բնակիչ Չխկո մականվամբ Արտակին: Դրանից հետո ծեծն անհետևանք չի մնացել: Օրեր անց, Չխկոն որոշել է իր մոտ ընկերների հետ հաշվեհարդար տեսնել իրեն ծեծողների հետ, ինչը սակայն, կրկին հանգուցալուծվել է նրա ծեծով: 

Այս կեսգիշերին էլ` ժամը 12:30-1:00-ի սահմաններում Չխկոյին առևանգել են Զովունի-Երևան ավոտճանապարհից: Տարել են «Դայմոնդ» սուպերմարկետին կից բենզալցակայան, որտեղ նորից դաժան ծեծի են ենթարկել տվյալ անձին: Այլ մանրամասներ հայտնի չեն: 

Այսպես կոչված Եղվարդի Գեդոյի տղերքը հայտնի են քրեական պատմություններով. մոտ 4-5 ամիս առաջ էլ Եղվարդի սուպերմարկետի մոտակայքում նրանք վիճաբանություն ու ծեծկռտուք են սկսել Այսեր անունով նախկին ԱԱԾ-ականի որդու հետ և ծեծել նրան: Վերջինս էլ անպատասխան չի թողել ծեծը. հավաքել է իր շրջապատի երիտասարդներին ու գնացել Գեդոյի տուն, ծեծի ենթարկել Գեդոյի որդուն: Մեզ հասած տեղեկություններով` Գեդոյի որդին նույնիսկ կոտրվածքներ է ստացել: 

Այս քրեական պատմությունները տեղի են ունենում արդեն ամիսներ շարունակ, իսկ իրավապահ համակարգը զբաղված է հետին թվով հանցագործությունների հետևից վազելով, դրանք կանխելու փոխարեն: Պարզ է, որ Մերձավանի նախադեպը պետք է զգոնության լրացուցիչ ազդակ դառնար հատկապես ոստիկանության համար, որ վաղօրոք կանխեին արդեն կատարվածը, բայց ՆԳ նախարարը նախընտրում է գնալ հուղարկավորությունների վայր ու տխրադեմ լուսանկարներ ունենալ: 

Այս հրապարակումից հետո, ոստիկանությունը պետք է հետամուտ լինի, որպեսզի դեռևս ծեծկռտուքների մակարդակով շարունակվող փոխադարձ վրեժը մարդկային ողբերգություններով չհատուցվի: Իսկ դրա համար նախ անհրաժեշտ է, որ յուրաքանչյուր դեպքից հետո, որի մասին, ոստիկանությունը, ըստ ամենայնի գիտի, համապատասխան քայլեր ձեռնարկի, հանցագործները չմնան առանց պատժի, ազատության մեջ, դեռ մի բան էլ թույլ տան իրենց նոր ծեծուջարդ նախաձեռնել: 

Չխկո մականունով Արտակի ծեծի միջադեպի մասին այլ տեղեկություններ ունեցողներին խնդրում ենք հայտնել մեր խմբագրությանը: