Սպիտակ «պեգասիկով» ասպետը փորձել է պաշտպանել թերուս պատգամավորուհուն՝ «ձիաուժի» հզորությունը չհաշվարկելով

Ազգային ժողովի առողջապահության հանձնաժողովի նախագահի ընտրությունն աղմուկ բարձրացրեց այն պատճառով, որ այդ պաշտոնում ընտրվեց միջնակարգ կրթությամբ մեկը: Հետո բոլորն իմացան, որ այդ մեկը ՔՊ-ական պատգամավոր էր՝ Հռիփսիմե Հունանյան անուն-ազգանունով:

Նա ամբիոնից ոչ միայն խոստովանեց, որ  բարձրագույն կրթություն չունի, այլև մի բան էլ մուննաթ եկավ, թե՝ ի՞նչ պարտադիր է բոլորը կրթություն ունենան:

Իհարկե, եթե նա կրթված լիներ, կհասկանար, որ բարձրագույն կրթություն ունենալը պարտադիր չէ միայն նրանց համար, ովքեր չեն հավակնում դառնալ, ասենք, պատգամավոր կամ նշանակվել, օրինակ, այն պաշտոնում, որում ինքը նշանակվեց/ընտրվեց:

Այս ամենը կլիներ շատ ծիծաղելի, եթե իրականում չարտացոլեր մեր երկրի ողբերգությունը: Անգամ դահլիճում գտնվող կրթված  ՔՊ-ականները չհամարձակվեցին դեմ քվեարկել նրան:

Այսպես շարունակվելու դեպքում, սրանք գուցե վաղն էլ ասեն, թե՝ դպրոցը մեր ինչի՞ն է պետք՝ տառերն ու թվերը տանն էլ կսովորենք:

Պատգամավորուհին թերևս հետ է մնացել թրենդից և տեղյակ չէ, որ կրթվելը ոչ միայն պարտադիր է, այլև նորաձև: Այնպես որ` նրան կարելի է ուղարկել Աննա Հակոբյանի նորաձևության դասընթացներին: Իսկ մինչ այդ, նրա այս հայտարարությունն արդարացիորեն առաջացրեց բարձրագույն կրթություն ստացած բոլոր մասնագետների վրդովմունքը:

Բարձրագույն ստացած մասնագետներն իրենց դատողություններն ու դիտարկումներն էին անում և քննադատում թերուս պատգամավորուհու անկիրթ պահվածքը:

Այդ էր պատճառը, որ 2018-ից հետո պաշտոնից պաշտոն թռչող Արսեն Թորոսյանը  որոշեց իր սպիտակ «պեգասիկով» ասպետի պատրանք ստեղծել ու փրկել պատգամավորուհուն «հալածանքներից»:

Բայց, քանի որ «ձիաուժի» հզորությունը չի ներել ավելի խելացի արձագանք տալ կիրթ մարդկանց քննադատություններին, ուստի պաշտապանական ճառը հնչել է ավելի անհեթեթ ու անկիրթ, քան թերուս պատգամավորուհու հայտարարությունը:

Թորոսյանի համար շատ տարօրինակ են այն կարծիքները, որ այս կամ այն պաշտոնն զբաղեցնելու համար կրթություն է պետք: Նրա դիտարկմամբ, պաշտոն զբաղեցնելու համար չափորոշիչ կարող է հանդիսանալ լավ մարդ լինելը: 

Պարզվում է` Հռիփսիմե Հունանյանը Թորոսյանին ծանոթ է կորոնովիրուսային շրջանից:

«Ես նրան ճանաչում եմ վաղուց՝ որպես գրագետ, բանիմաց և սրտացավ մասնագետ ու քաղաքացի։ Բայց ես նրան ամբողջությամբ «բացահայտել» եմ կորոնավիրուսային համավարակի ժամանակ, երբ նա, լինելով մեր երկրի ամենամեծ վերակենդանացման բաժանմունքի ավագ բուժքույր, բժիշկների հետ ուս-ուսի տված, հազարավոր կյանքեր է փրկել...»։

Արսեն Թորոսյանը չի հասկացել, որ լավ մարդ լինելը պաշտոն ունենալու համար չի կարող չափորոշիչ լինել: Իսկ եթե այդպես է՝ ինչո՞ւ են մարդիկ տարիներ շարունակ ուսում ստանում, վճարում դրա համար և գրքեր մաշում:

Արսեն Թորոսյանն անգամ չի հասկացել, որ բոլոր բուհ ավարտածների համար, ովքեր իրենց նվիրել են ուսմանը՝ լավ մասնագետ դառնալու համար, պատգամավորուհու հիմար  հայտարարությունը վիրավորանք էր ու ապտակ:

Ուրեմն բոլորը զո՞ւր են սովորում...

Մյուս կողմից էլ, անկիրթ մարդկանց կառավելը հեշտ է և, ցավով արձանագրենք, որ իշխանությանը ձեռնտու չէ կրթությունը մղել առաջին պլան:

Արմինե Մկրտումյան