Այս մարդիկ ատում են բոլոր հեղինակություններին. Մամիկոն Ասլանյան. «Հրապարակ»

«Հրապարակի» զրուցակիցը Վանաձորի ընտրված, սակայն քաղաքական ռեպրեսիաների արդյունքում քաղաքապետ չդարձած Մամիկոն Ասլանյանն է:

- «Քաղաքացիական պայմանագիր» կուսակցությունը` իր առաջնորդի գլխավորությամբ, ազնիվ եւ արդար ընտրություն է համարում միայն այն ընտրությունը, որտեղ հաղթել է ՔՊ-ն: Բոլոր այն դեպքերում, երբ ընդդիմադիր թեկնածու է հաղթում, ՔՊ-ականներն այդ ընտրությունը որակում են կեղծված, կաշառված, հաղթանակ արձանագրած ուժին մեղադրում տարբեր զանցանքների մեջ, սպառնում, որ նոր ընտրությունների են գնալու: Սկսում են իշխանությունը գողանալու գործընթաց: Վանաձորում՝ Ձեր օրինակը, Գյումրիում` Սամվել Բալասանյանի, հիմա էլ` Վարդան Ղուկասյանի, Ալավերդիում` Արկադի Թամազյանի, եւ այսպես շարունակ: Խոսակցություններ կան, որ մինչեւ համապետական ընտրությունները, իշխանությունը ցանկանում է ազատվել նաեւ Աբովյանի ԲՀԿ-ական համայնքապետից: Ձեր կարծիքով` ի՞նչն է այս ամենի պատճառը:

- Այս մարդիկ ուղղակի իրենց իսկ հռչակած կեղծ թեզերը որոշել են կյանքի կոչել, սակայն լրիվ հակառակ ձեւով: Այն, որ խոսում են ժողովրդավարությունից, թափանցիկ ընտրություններից, դրանք լրիվ դեկլարատիվ բնույթի փաթեթավորված հայտարարություններ են: Իրականում, այս մարդիկ պատրաստ չեն տեսնել այլընտրանք, պատրաստ չեն լսել այլ տեսակետ, նրանք Խորհրդային Միության օրինակով փորձում են Հայաստանը դարձնել միակուսակցական համակարգով, իրենց հարմար պետություն` ցանկացած գնով, նույնիսկ մարդկանց սպանելու, բանտարկելու, սպառնալու գնով: Ցանկացած միջոցով փորձում են իշխանությունն հպատակեցնել: Այս մարդիկ ոչ մի ձեւով կապ չունեն ժողովրդավարության հետ: Նաեւ հոգեբանական խնդիր ունեն, չեն կարողանում համակերպվել այն մտքի հետ, որ կարող են նաեւ պարտվել:

- Խոսեցիք սպանությունից: Ի՞նչ եք կարծում` Փարաքարում տեղի ունեցած սպանության մեջ քաղաքական մոտիվներ կա՞ն:

- Քրեական մանրամաս­նու­թյուն­ների մեջ չեմ կարող եւ չեմ էլ ուզում մտնել, սակայն, ընդհանուր առմամբ, Փարաքարում տեղի ունեցածն այս տարիների հետընտրական պատմությունների հանրագումարն էր…. թե տակը ինչ մանրամասնություններ կան, դրանք պետք է իրավապահները պարզեն, սակայն տեղի ունեցածը ընտրությունների արդյունքում ոչ ժողովրդավար ու սխալ մոտեցման հանգուցալուծումն էր: Անհանդուրժողականություն, խտրականություն ընդդիմադիրների նկատմամբ, հենց այդ դրսեւորումները բերում են նման ողբերգական իրադարձությունների:

- Ինչո՞ւ են հատկապես այս շրջանում որոշել ընդդիմադիր համայնքապետերի դեմ պայքարել:

- Հայաստանում միշտ էլ ինչ-որ մի տեղ ընտրություն է, եթե համապետական ընտրություններն են պատճառը, ապա իմաստ չեմ տեսնում: Մեթոդները նույնն են, մտածելակերպը՝ եւս, նրանց մտածողության մեջ ոչինչ չի փոխվում, բացի դա՝ անպատժելիության էսկալացիայի մեջ են, եւ այդպես շարունակ: Ամեն գնով ուզում են խլել իշխանությունն ընդդիմադիր ուժերից: Նրանք անհաշտ են բոլոր կարգի այլընտրանքի հանդեպ: Հո միայն ընդդիմադիր համայնքապետե՞րը չեն, սրբազանները, բարերար Սամվել Կարապետյանը: Այս մարդկանց համար ցանկացած այլընտրանք խիստ անընդունելի է: Նրանք ատում են բոլոր հեղինակություններին: Ապօրինաբար պատրաստ են պայքարել ցանկացածի դեմ:

- Թեպետ Վարդան Ղուկասյանն այն համայնքապետը եւ անձը չէ, որով կարելի է հիանալ, սակայն, այնուամենայնիվ, ընտրված համայնքապետ է, համակրենք նրան, թե ոչ, նա է Գյումրու ընտրությունը: Իշխանությունները չեն հաշտվում նաեւ այդ ընտրության հետ:

- Քայլերից, դրանց համադրությունից երեւում է, որ Գյումրիում եւս ցանկանում են իրավապահ ահաբեկչության միջոցով իշխանությունը վերցնել` պարտությունը վերածելով կեղծ հաղթանակի: Փորձում են մի այնպիսի սոդոմ-գոմոր ստեղծել, որ շունը տիրոջը չճանաչի:

- Այս ամենից հասարակությունն արդյոք ավելի վճռական չի՞ դառնում: Գուցե մարդիկ, տեսնելով այս ամենը, ավելի կտրուկ լինեն իրենց ընտրության հարցում:

- Ժողովուրդն իր ցասումը հայտնում է ընտրությունների միջոցով: Ոչ մեկն այսօր ժողովրդին չի առաջնորդում: Մարդիկ գնում են ընտրատեղամաս եւ իրենց անհամաձայնությունը հայտնում այնտեղ, սակայն խնդիրն այն է, որ վերջին չորս-հինգ տարիներին ժողովրդի ձայները գողացվում եւ անտեսվում են: