Օշականում մեկտեղվեց ողջ հոգևոր դասը․ Սուրբ Մեսրոպ Մաշտոց եկեղեցու ուխտի օրն է

Այսօր Հայաստանյայց Առաքելական Սուրբ եկեղեցին տոնում է Սրբոց Թարգմանչաց վարդապետների հիշատակության տոնը, այս օրը նաև Արագածոտնի թեմի Առաջնորդանիստ Սուրբ Մեսրոպ Մաշտոց եկեղեցու ուխտի օրն է․

«Տարիներ շարունակ թեմում ձևավորված բարի ավանդույթի համաձայն, օրհնությամբ Թեմակալ Առաջնորդ Գերաշնորհ Տեր Մկրտիչ եպիսկոպոս Պռոշյանի , այս տարի ևս Մաշտոցյան Մատենադարանից եկեղեցի բերվեց Շուխոնց հրաշագործ Ավետարանը ու Թեմակալ Առաջնորդի հանդիսապետությամբ մատուցվեց տոնական Սուրբ և Անմահ Պատարագ:

Այս տոնին գեղեցիկ ավանդույթ է նաև՝ Օշականում է մեկտեղվում թեմի ողջ հոգևոր դասը:

Ընկալյալ կարգի համաձայն Սուրբ և Անմահ Պատարագը մատուցեց Գևորգյան Հոգևոր ճեմարանի և Սևանի Վազգենյան Հոգևոր դպրանոցի տեսուչ Հոգեշնորհ՝ Տեր Շահե Ծայրագույն վարդապետ Անանյանը:

Ճեմարանի սաներն ուխտավորաբար մասնակցեցին և իրենց սպասավորությունը բերեցին Սուրբ և Անմահ Պատարագին։

Թեմակալ Առաջնորդի օրհնությամբ Թարգմանչաց խորհախորհուրդ տոնի առիթով կազմակերպվեց նաև թեմական ուխտերթ Աշտարակի Սուրբ Մարիանե եկեղեցուց դեպի Օշականի Սուրբ Մեսրոպ Մաշտոց եկեղեցի՝ «ՀԱՅՈՑ ԹԱՐԳՄԱՆՉԱՑ ՍՐԲԱՎԱՅՐ»:

Ուխտավորներն ուխտերթից առաջ Աշտարակի Սուրբ Մարիանե եկեղեցում մասնակցեցին ընդհանրական խոստովանության:

Խոստովանությունը կատարեց և հավատացյալներին իր օրհնությունը փոխանցեց Թեմակալ Առաջնորդ Գերաշնորհ Տեր Մկրտիչ եպիսկոպոս Պռոշյանը:

Խոստովանությունից հետո հավատացյալները ոտքով անցան ուխտի ճանապարհով:

Աղոթքներ, սաղմոսներ, Նարեկացի ու Շնորհալի, հոգևոր երգեր. աղոթական էր ուխտերթի ողջ ճանապարհը:

Ուխտերթից հետո հավատավոր ժողովուրդը մասնակից դարձավ Սուրբ Պատարագին ու հնարավորություն ունեցան մոտենալ Ավետարանին և աղոթել սրբության առաջ։

Ուխտերթին մասնակից և Սուրբ Պատարագին աղոթակից էին՝ հոգևորականներ, թեմի երիտասարդաց միությունների, համայնքների անդամներ, միանձնուհիներ, Աշտարակի Գուլամերյան Հայորդյաց տան սաներ և աշխատակիցներ, ուխտավորներ:

Փառք Քեզ, Աստուած, փառք Քեզ, յաղագս ամենայնի, Տէր, փառք Քեզ»,- նշվում է Արագածոտնի թեմում»: