Այն, ինչ այսօր կատարվում է Արագածոտնում, վտանգավոր նախադեպ է, որը հիշեցնում է խորհրդային 1930-ականների հակաեկեղեցական քաղաքականությունը, երբ հարյուրավոր հայ հոգևորականներ աքսորվեցին կամ բանտարկվեցին. «Քոչարի» կուսակցություն

«Քոչարի» կուսակցությունը հայտարարություն է տարածել հոգևոր արժեքների դեմ ուղղված պետական ճնշումների վերաբերյալ:

Հայտարարության մեջ, մասնավորապես, ասվում է.

«Հայ ժողովրդի հոգևոր հիմքը եղել և մնում է մեր Եկեղեցին։ Դարեր շարունակ՝ օսմանյան բռնապետություններից մինչև խորհրդային Աթեիզմը, հենց հոգևորականներն են եղել ազգային ինքնության պահպանման կուռ ողնաշարը։

Այսօր, ցավոք, մենք ականատես ենք դառնում նոր և վտանգավոր երևույթի՝ իշխանական համակարգի կողմից հոգևոր արժեքների դեմ ուղղված նպատակային հալածանքի։

Արագածոտնի թեմի հոգևորականների ձերբակալությունները, որոնք ըստ տարբեր աղբյուրների հասնում են տասներկուսի, իրականում ոչ թե իրավական գործընթաց են, այլ քաղաքական բնույթի գործողություններ, որոնք վտանգում են Հայաստանի Հանրապետության հոգևոր և բարոյական կայունությունը։
Քրեական գործի հիմքում դրված է՝ «հանրահավաքին մասնակցելու հարկադրանք» ձևակերպումը, սակայն մինչ այսօր հանրությանը չեն ներկայացվել ոչ մի բացահայտված ապացույց, ոչ ձայնագրություններ, ոչ փորձաքննության արդյունքներ, ոչ վկայությունների իսկության հաստատումներ։

Հենց այստեղ է կարևոր փաստը. մենք հարցնում ենք՝ որտեղից գիտեն, որ ցուցմունք տվող անձը չի ստում, չի լուծում վրեժ, չունի անձնական կամ հոգևոր շահ, և որ նրա վկայությունները չեն մանիպուլյացված՝ օգտագործվելով իշխանության կամ արտաքին շահերի համար։ Եթե այդ փաստարկները բացակա  են, ապա մեղադրանքը չի կարող հիմնված լինել անկախ և օրինական դատաքննության վրա։

Մենք նաև գտնում ենք, որ այս գործողություններն ունեն նաև միջազգային բաղադրիչ։ Մենք չենք բացառում և զգուշությամբ դիտարկում ենք, որ այս գործընթացները կարող են լինել Ադրբեջանի և Թուրքիայի պատվերի մաս, ինչն օգտագործվում է տարածաշրջանային ազդեցությամբ ներքին քաղաքական ճեղքվածություններ առաջացնելու և Հայաստանի առջև արտաքին նպատակներ դնելու համար։ Սա ևս պահանջում է անկախ ու խիստ ուսումնասիրություն, քանի որ արտաքին միջամտության ենթադրյալությունը լրջագույն անվտանգության և իշխանության հաշվետվողականության հարց է։

Սա նաև մանիպուլյացիայի պարզ ձև է՝ ժողովրդին շեղելու համար հանրային ուշադրությունը հիմնական, ճշմարտացի եվ սուր խնդիրներից։ Այդ խնդիրների ցանկը՝

սոցիալական վատ ապրելու պայմանները,

աղքատությունը,

սոցիալական եւ տնտեսական անարդարությունը,

խաղաղության օրակարգի ձախողումը և հանրային վստահության կորուստը,

հանցագործությունների աճը և սպանությունների ավելացումը,

թմրադեղերի տարածման արագ աճը։

Ամեն ինստիտուտ ձախողված է՝ օրենքի գերակայությունից մինչև սոցիալական երաշխիքների համակարգ. այս իրավիճակը պահանջում է փակ, արդար, անկախ և հանրային հետաքննություն, այլ ոչ թե քաղաքական հաշվեհարդար կամ սենյակային ճնշումներ։

Առանց այս հարցերի պատասխանների՝ որևէ մեղադրանք ոչ թե արդարադատության դրսևորում է, այլ քաղաքական հաշվեհարդար։
Այն, ինչ այսօր կատարվում է Արագածոտնում, վտանգավոր նախադեպ է, որը հիշեցնում է խորհրդային 1930-ականների հակաեկեղեցական քաղաքականությունը, երբ հարյուրավոր հայ հոգևորականներ աքսորվեցին կամ բանտարկվեցին՝ միայն իրենց համոզմունքների համար։
Վերջին անգամ նման լայնամաշտաբ հալածանք հայ հոգևորականների դեմ եղել է դեռևս Եղեռնի նախաշեմին, երբ Օսմանյան իշխանությունները ձերբակալեցին Կ.Պոլսո և արևմտահայոց բազմաթիվ եկեղեցականների՝ ազգային առաջնորդությունը ոչնչացնելու նպատակով։

Այսօր՝ XXI դարում, անկախ Հայաստանում, կրկնվում են նույն սխալները՝ հոգևորականը դարձվում է «համակարգի թշնամի», իսկ հավատը՝ քաղաքական հանցագործություն։

Մենք՝
«ՔՈՉԱՐԻ — Ազգային Վերածնունդ և Ազգի Զարթոնք» Կուսակցությունը,
պահանջում ենք՝

1. Անմիջապես հրապարակել բոլոր ապացույցները՝ ձայնագրությունները, ցուցմունքները և փորձաքննությունների եզրակացությունները։

2. Ապահովել Եկեղեցու և պետության հարաբերությունների իրական անջատվածությունը՝ առանց քաղաքական միջամտության։

3. Սահմանել անկախ հասարակական հանձնաժողով՝ վերահսկելու հոգևորականների դեմ հարուցված գործերի օրինականությունը։

4. Ազատել բոլոր հոգևորականներին մինչև մեղադրանքի փաստացի հաստատումը՝ հաշվի առնելով նրանց հանրային հեղինակությունը և հարգանքը։

Հայ ժողովուրդը չի հանդուրժի նոր հոգևոր ճնշում։

Եկեղեցու դեմ հարվածելը նշանակում է հարվածել ազգային հիշողությանը, ինքնությանը և ապագային։

ՔՈՉԱՐԻ Ազգային Վերածնունդ և Ազգի Զարթոնք
Կուսակցության վարչություն