Վահագն Խաչատուրյանը բարձր է գնահատել «Իզմիրլյան» հիմնադրամի հետևողական և բազմաշերտ գործունեությունը

Հանրապետության նախագահ Վահագն Խաչատուրյանն այցելել է «Իզմիրլյան» հիմնադրամ:

Հիմնադրամի հայաստանյան գրասենյակի տնօրեն Արմեն Չոբանյանը նախագահին ներկայացրել է հիմնադրամի գործունեության հայեցակարգը, կառուցվածքը և տարիների ընթացքում իրականացված ծրագրերը։ Տնօրենը մանրամասնել է հիմնադրամի կողմից կրթության, առողջապահության, սոցիալական, գյուղատնտեսական և մի շարք այլ ոլորտներում իրականացվող ծրագրերը՝ ընդգծելով դրանց կարևորությունը և ազդեցությունը համայնքների զարգացման վրա։

Անդրադարձ է կատարվել նաև հիմնադրամի կողմից Կառավարության հետ համատեղ իրականացվող խոշոր նախաձեռնություններին, որոնց նպատակն է նպաստել երկրի սոցիալ-տնտեսական առաջընթացին և հասարակության տարբեր շերտերի կյանքի որակի բարձրացմանը։ Արմեն Չոբանյանը ներկայացրել է նաև ընթացիկ և առաջիկայում իրականացվելիք ծրագրերը՝ մասնավորապես ընդգծելով համայնքային զարգացման և գյուղատնտեսական ոլորտի նկատմամբ շարունակական ուշադրությունը։

Զրույցի ընթացքում անդրադարձ է եղել նաև «Վանանդ Ագրո» ընկերության կողմից հիմնադրված նշի ինտենսիվ այգիներում կատարված ներդրումներին և ներկայումս ընթացող բերքահավաքի գործընթացին։ Նշվել է, որ օրեր առաջ Հանրապետության նախագահը այցելել էր նշի այգիներ՝ ծանոթանալու բերքահավաքի ընթացքին և գործնական արդյունքներին։

Նախագահ Վահագն Խաչատուրյանը բարձր է գնահատել հիմնադրամի հետևողական և բազմաշերտ գործունեությունը՝ ընդգծելով այն որպես օրինակելի գործընկեր պետական կառույցների և տեղական համայնքների համար։