Բրավո Հովիկ Աղազարյանին ու Հակոբ Ասլանյանին՝ իմպիչմենտին չխոչընդոտելու համար. Ռուբինյան

ՔՊ-ից հեռացված պատգամավորներ Հովիկ Աղազարյանն ու Հակոբ Ասլանյանը չեն խոչընդոտի իմպիչմենտի գործընթացին։ ԱԺ նիստում հայտարարեց իմպիչմենտի գործընթացը նախաձեռնած` ԱԺ «Պատիվ ունեմ» խմբակցության ղեկավար Հայկ Մամիջանյանը։

ԱԺ-ում քննարկվում է «Պատիվ ունեմ» խմբակցության կողմից ներկայացված «Ազգային ճգնաժամի և կառավարման ձախողման մասին» հայտարարության նախագիծը, որի վերաբերյալ ԱԺ պետաիրավական հարցերի հանձնաժողովը տվել է բացասական եզրակացություն։ Այդ իսկ պատճառով նստաշրջանի օրակարգ ընդգրկվելու համար հարցը քննարկվում է առանձին։ Հարցի քննարկումից հետո կկայանա քվեարկություն։

Հայտարարության նախագիծը ներկայացնելիս՝ Հայկ Մամիջանյանն ասաց, որ Նիկոլ Փաշինյանին պետք է օր առաջ հեռացնել իշխանությունից, իսկ դրա միակ գործիքը իմպիչմենտն է։

«Իմպիչմենտի հիմնական ուժը, հաջողության հասնելու կարևորագույն գրավականը  հանրային լայն համախմբումն է՝ փողոցային պայքարով։

Հունիսի 7-ին, երբ այս գործընթացը նախաձեռնվեց, ձևաթղթի տակ ստորագրել էր 6 պատգամավոր, հոկտեմբերի 8-ին՝ փաստացի ձևաթղթի տակ արդեն իսկ առկա է 34 ստորագրություն։

Անցյալ շաբաթ հանդիպել եմ ԱԺ անկախ պատգամավոր Հովիկ Աղազարյանի հետ՝ քննարկելու  իմպիչմենտի գործընթացին նրա և անկախ պատգամավոր Հակոբ Ասլանյանի մասնակցության հարցը։

«Այս պահին կարող եմ հայտարարել, որ նրանք չեն խոչընդոտելու իմպիչմենտի գործընթացին, և քննարկումները շարունակվելում են»,- ասաց Մամիջանյանը։

ԱԺ փոխնախագահ Ռուբեն Ռուբինյանն էլ արձագանքեց. «Բրավո Հովիկ Աղազարյանին ու Հակոբ Ասլանյանին։ Ուրախ եմ, որ միմյանց հետ հանդիպում, խոսում եք»։