Ստեփան Ասատրյանի կողմից պատարագ մատուցելը նզովքի է արժանի. դա խաբեություն է, հավատացյալի բարեպաշտական զգացմունքներին դիպչել է. Հովնան Սրբազան

Գուգարաց թեմի առաջնորդ, Մայր Աթոռ Սուրբ Էջմիածնի Պարգևների շնորհման և կարգապահական հարցերի հանձնախմբի անդամ Գերաշնորհ Տեր Հովնան եպիսկոպոս Հակոբյանը պնդում է՝ Ստեփան Ասատրյանը՝ նախկին հոգևորական Տեր Արամը, իրավունք չունի պատարագ մատուցելու, նա շնորհներից զրկված անձ է։

«Ինքը զբաղված է խաբեությամբ, խաբում է ժողովրդին։ Աստվածաշնչի մեջ Աբելն էլ պատարագ մատուցեց ու Աստված չընդունեց այդ պատարագը, հիմա իր պատարագն Աստծո մոտ ընդունելի կլինի՞, թե՞ չէ»,- Aysor.am-ի հետ զրույցում ասաց Հովնան Սրբազանը։

Սրբազան Հոր գնահատմամբ՝ այդպես լինի՝ յուրաքանչյուր մեկը կարող է պատարագ մատուցել, քանի որ նախկին հոգևորականն արդեն համահավասար է աշխարհիկ անձի։

Ստեփան Ասատրյանի կողմից պատարագ մատուցելը նզովքի է արժանի։

«Դա խաբեություն է, հավատացյալի բարեպաշտական զգացմունքներին դիպչել է»,- նշեց Գուգարաց թեմի առաջնորդը։

Ստեփան Ասատրյանը երեկ նաև մկրտություն է արել։ Սրբազանն ընդգծում է՝  այդ մկրտությունն անընդունելի է, այդ մարդը չի կարող համարվել մկրտված, քանի որ մկրտողը պետք է ունենա ձեռնադրություն, իսկ Ստեփան Ասատրյանի ձեռնադրությունը կասեցված է։

«Ինքը չունի այդ շնորհը, որ փոխանցի»,- նշեց Սրբազան Հայրը։

Հովնան Սրբազանի գնահատմամբ՝ Ստեփան Ասատրյանն ինքն իրեն տանում է հերձվածի. «Նոր հերձվածողական խումբ է ստեղծելու Հայաստանում»։

Հիշեցնենք՝ հոկտեմբերի 21-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի Հայրապետական տնօրինությամբ կարգալույծ է հռչակվել Տ․ Արամ քահանա Ասատրյանը: 

Կարգալույծ եկեղեցականն այսուհետ կդասվի աշխարհականների շարքին՝ Ստեփան Ասատրյան ավազանի անունով: Նա պետք է դադարի գործունեությունը Հովհաննավանքում, Ստեփան Ասատրյանը, սակայն, որոշել է կիրակի օրը պատարագ մատուցել Հովհաննավանքում։

ՔՊ-ականներին ոգևորել է Ստեփան Ասատյանի այս քայլը. վարչապետ Նիկոլ Փաշինյանը հայտարարել է, որ առաջիկա կիրակի օրը Հովհաննավանքում մասնակցելու է Ասատրյանի կողմից մատուցվող պատարագին: