Ինչի՞ մասին էր Օվերչուկի հայտարարությունը․ վերլուծաբան

Վերլուծաբան Հակոբ Բադալյանը գրել է․

««Ադրբեջանական կողմը հաստատել է մեզ Ադրբեջանի երկաթուղիները օգտագործելու հնարավորությունը՝ Ռուսաստանի արտադրանքը Ադրբեջանի տարածքով Հայաստան տարանցիկ տեղափոխելու նպատակով։

Այսինքն՝ այս առումով մենք ունենք շատ հետաքրքիր զարգացումներ։ Այժմ «Ռուսաստանի երկաթուղիներ» ընկերությունը տարածաշրջանի իր գործընկերների հետ միասին լուծում է այն հարցերը, թե ինչպես կազմակերպել այդ փոխադրումները։ Միաժամանակ համապատասխան հանձնարարականներ են տրվել նաև գյուղատնտեսության նախարարության միջոցով՝ այս նոր լոգիստիկ երթուղին յուրացնելու նպատակով»։

Գիտե՞ք սա ում խոսքերն են: Ռուսաստանի փոխվարչապետ Ալեքսեյ Օվերչուկի: Նա դրանք ասել է լրագրողների հետ ճեպազրույցում: Իսկ հիշու՞մ եք, թե ինչի մասին հայտարարվեց օրերս: Այո, Ադրբեջանը հայտարարեց իր տարածքով դեպի Հայաստան տարանցումների սահմանափակումը, իսկ անմիջապես այդ հայտարարությունից հետո Երեւանից հնչեց ղազախական ցորենի մասին տեղեկությունը: Եվ անմիջապես գործի լծվեցին «հաակառուսականության» վրա քաղաքական եւ քաղաքագիտական «ժանգլյորությամբ» լսարան հավաքողները, այս զարգացումը ներկայացնելով իբրեւ Ռուսաստանը շրջանցելու մի հերթական «անկախ ու ինքնիշխան» ձեռքբերում:

Հիշեցնում եմ նաեւ իմ գնահատականը, որ բարձրաձայնել եմ թե հարցազրույցների, թե տելեգրամյան գրառումների ընթացքում: Ես նշել եմ, որ ըստ իս, այս «ղազախական ցորենի» պատմությունը Դուշանբեում ԱՊՀ պետությունների գագաթնաժողովի շրջանակում Ռուսաստանի մոդերատորությամբ դիտարկված սխեմա է, այդ թվում վկայակոչելով Դուշանբեում Պուտին-Ալիեւ հանդիպման հանգամանը, որը վերջին գրեթե մեկ տարվա լարվածության պայմաններում նրանց առաջին ու բավականին ջերմ հանդիպումն էր, կարծես այդ լարվածությունը չէր էլ եղել: Եվ ահա, Օվերչուկը բարձրաձայնում է, որ տեւական ժամանակ Ադրբեջանի հետ քննարկվում է դեպի Հայաստան երկաթուղային տարանցման սխեման»։