Գևորգ Թամամյանը արժանացել է Ամերիկայի կլինիկական ուռուցքաբանական միության FASCO կոչմանը

Հայ բժիշկ, մանկական արյունաբան-ուռուցքաբան Գևորգ Թամամյանն արժանացել է Ամերիկայի կլինիկական ուռուցքաբանական միության` Fellow of ASCO (FASCO) կոչմանը։ Այս մասին նա հայտնել է իր ֆեյսբուքյան էջում։

«Մեծ պատիվ է արժանանալ աշխարհի խոշորագույն ուռուցքաբանական միության` Ամերիկայի կլինիկական ուռուցքաբանական միության` Fellow of ASCO (FASCO) կոչմանը, ինչը շնորհվում է միության այն անդամներին, ովքեր «զգալի ներդրում են ունեցել միության առաքելության իրականացման գործում, ցուցաբերել են բացառիկ նվիրվածություն՝ կամավոր ջանքերի միջոցով նպաստելով միությանը, ուռուցքաբանություն մասնագիտությանը և, ամենից կարևոր՝ այն պացիենտներին, ում ծառայում ենք»։

Տարիներ առաջ, երբ առաջին անգամ ոտք դրեցի միության տարեկան կոնգրեսին, երբ ամբողջ Չիկագո քաղաքը եռում էր աշխարհի չորս կողմերից մոտ հիսուն հազար ուռուցքաբանների եւ միության անդամների շարժից, երբ բեմի վրա առաջին անգամ տեսա թե ինչպես է աշխարհի հզորագույն մասնագետներին, ում անունները միայն գրքերում էի կարդացել, շնորհվում FASCO կոչումը, չէի էլ կարող պատկերացնել, որ կգա մի օր...

Ինչ ասեմ` շնորհակալ եմ յուրաքանչյուրից, ով ուղղակի կամ անուղղակի, որեւէ կերպ նպաստել է այս օրվան։ Ինչքան որ մեծ պատիվ է, բազմակի անգամ՝ պարտավորեցնող»,- նշված է Թամամյանի գրառման մեջ։

Գևորգ Թամամյանն աշխատում է 2008 թվականից։ Նա հայ հայտնի ուռուցքաբան է, Երևանի պետական բժշկական համալսարանի պրոֆեսոր և Ուռուցքաբանության ամբիոնի վարիչ։ Թամամյանը ղեկավարում է Հայաստանի մանկական քաղցկեղի և արյան հիվանդությունների կենտրոնը, ինչպես նաև խորհրդական է Պրոֆ. Ռ. Հ. Յոլյանի անվան Արյունաբանական կենտրոնում։ Թամամյանը գիտական և դասախոսական գործունեություն է ծավալում նաև Հարվարդի համալսարանում ու Ուլմի համալսարանում։ 2024 թվականին ընտրվել է Մանկական ուռուցքաբանության միջազգային միության (SIOP Asia) նախագահ՝ դառնալով տարածաշրջանում մանկական ուռուցքաբանության զարգացման առաջատար մասնագետներից մեկը։