ՀԷՑ-ի խնայողություններից 6,5 մլն դոլար ուղղվեց վարկային պարտավորությունների վաղաժամկետ մարմանը. Ռոմանոս Պետրոսյան

ՀԷՑ-ի ընթացիկ խնայողություններից ևս 6,5 մլն ԱՄՆ դոլար ֆինանսական միջոցներ ուղղվեցին վարկային պարտավորությունների վաղաժամկետ մարմանը։ Այդ մասին ասված է ՀԷՑ-ի ժամանակավոր կառավարիչ Ռոմանոս Պետրոսյանի Ֆեյսբուքի էջում:

«Այսպիսով՝ բացի ՀԷՑ-ի ունեցած վարկային պարտավորությունների ընթացիկ պլանային մարումներից (մայր գումար + տոկոսագումարներ), ՀԾԿՀ կողմից ՀԷՑ-ի Ժամանակավոր կառավարչի նշանակումից հետո վաղաժամկետ մարվել է ավելի քան 20 մլն ԱՄՆ դոլար վարկային պարտավորություն (վարկի մայր գումար)։

Այս պահին «ՀԷՑ» ՓԲԸ ունեցած վարկային պարտավորությունները կազմում են 376,6 մլն ԱՄՆ դոլար, որից միջազգային բանկերին՝ շուրջ $ 116,2 մլն։

Հուլիս ամսվա ավարտին (վարույթի նախաձեռնման սկզբին) ՀԷՑ-ում առկա էր շուրջ 396,8 ԱՄՆ դոլարի չափով պարտավորություն, որից միջազգային բանկերին՝ $ 123,3 մլն:

Աներկբա է՝ ՀԷՑ-ն իր բնականոն գործունեությանն անհրաժեշտ (գնումներ, մատակարարումներ, կապալի աշխատանքներ, պահպանման ծախսեր և այլն) բոլոր պայմանագրային պարտավորությունները կատարում է հավուր պատշաճի՝ ըստ հաստատված վճարումների պլանի և կատարված/մատուցված աշխատանքների/ծառայությունների կատարողական ակտերի։

Հավելեմ նաև, որ իմ նշանակումից ի վեր ՀԷՑ-ն իսպառ դադարեցրել է որոշ արտոնյալ մենաշնորհային դիրք ունեցող մատակար և կապալառու ընկերությունների միլիարդավոր ՀՀ դրամի կանխավճարների տրամադրումը՝ ի հաշիվ սեփական ֆինանսական պարտավորությունների ծանրաբեռնվածության։

ՀԷՑ-ը ծառայում է մեր ժողովրդին»,- նշված է գրառման մեջ։