Տպավորություն է, որ որոշ մարդիկ Փարաքարի հանցագործության բացահայտումից նեղսրտել են. չբացահայտվեր՝ հնարավորություն կար շահարկելու. ՔԿ նախագահ

Քննչական կոմիտեի նախագահ Արթուր Պողոսյանը պնդում է, թե կաշկանդվածություն չունեն Փարաքարի սպանությունների դեպքերը բացահայտելու ուղղությամբ։

«Այլ հանցակիցներ լինելու մասով կատարում ենք քննություններ, որևիցե կաշկանդվածություն չունենք, ինչո՞ւ կամ ումի՞ց պետք է ունենանք այդ կաշկանդվածությունը»,- ԱԺ-ում հայտարարեց նա։

ՔԿ նախագահն այնպիսի տպավորություն ունի, որ որոշ մարդիկ այդ հանցագործության բացահայտումից նեղսրտել են։

«Դժգոհ են մնացել, որ հանցագործությունը բացահայտվել է, քանի որ, եթե չբացահայտվեր, հնարավորություն էր տալու այլ հարցեր շահարկելու, հիմա վա՞տ է, որ բացահայտվել է»,- նշեց նա։

Պողոսյանը հայտարարեց, թե այս գործը գտնվում է իր հսկողության տակ ու հանրությունը կստանա բոլոր հարցերի պատասխանները։

«Եթե եղել է պատվիրատու՝ վստահ եղեք, որ բացահայտվելու է, մենք կներկայացնենք, թե ինչ գործողություններ ենք կատարել, դուք հաճելիորեն կզարմանաք»,- ասաց նա։

Հիշեցնենք՝ սեպտեմբերի 23-ին՝ ժամը 23։52-ին, ՆԳՆ ոստիկանություն ահազանգ էր ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։ 

Սպանվել էին Փարաքարի համայնքապետ Վալոդյա Գրիգորյանն ու  քրեական ոստիկան Կարեն Աբրահամյանը: Վիրավորում էր ստացել նրանց հետ գտնվող երրորդ անձը՝ Արծրուն Գալստյանը:

Ողբերգական այս միջադեպը կապ ունի փետրվարին տեղի ունեցած սպանության հետ։ Փետրվարին Մերձավանի նախկին համայնքապետի՝  ՔՊ-ական Մհեր Ախտոյանի տան մոտ սպանվել էր նրա ազգականը՝ 29-ամյա Գրիգոր Օհանյանը, որը Փարաքարի համայնքապետ Վալոդյա Գրիգորյանի սպանությանն օժանդակելու համար մեղադրվող Նարեկ Օհանյանի եղբայրն է:

Փարաքարի համայնքապետի և նրա ընկերոջ սպանության գործով կալանավորված են Մերձավանի բնակիչներ Նարեկ Օհանյանն ու Գևորգ Հարությունյանը: Հարությունյանը, ով կատարել է սպանությունները, ըստ լրատվամիջոցների, Օհանյան եղբայրների ընկերն է։