Հայր Սահակն արձագանքել է Ալեն Սիմոնյանին

Օրեր առաջ Ազգային ժողովի նախագահ Ալեն Սիմոնյանը Սյունիք էր այցելել, եղել նաև Տաթևի վանքում։ Տաթևի վանքից նա լուսանկարներ էր հրապարակել Հայր Միքայելի ու Հայր Սահակի հետ, և շատերի մոտ այն տպավորությունն էր, որ Հայր Սահակը, ով Արցախի Գանձասարի վանահայրն էր, ջերմ ընդունելության է արժանացրել եկեղեցուն դեմ դուրս եկած իշխանության ներկայացուցիչներին։  Տաթևի վանական համալիրի վանահայր Տեր Սահակ վարդապետ Շաքարյանը Aysor.am-ին տված հարցազրույցում հերքել է բոլոր լուրերը, թե հատուկ հանդիպել է Ալեն Սիմոնյանին. նրանց հանդիպումը պատահական է եղել։

Ալեն Սիմոնյանն արձագանքել է Տաթևի վանական համալիրի վանահայր Հայր Սահակի հայտարարությանը. «Ստում է։ Հանդիպումը եղել է ինձ համար շատ հաճելի։  Հայր Սահակը իմ կողմից շատ հարգված Հայր Միքայելի հետ ինձ դիմավորց հենց մուտքի մոտ՝ հետագայում չթողնելով Հայր Միքայելը որևէ շփում ունենա ինձ հետ, միանձնյա ամբողջ տարածքը ցույց տվեց, քննարկեցինք բոլոր հնարավոր հարցերը, Հայր Սահակն ինձ նաև պատմեց այն աշխատանքների մասին, որոնք տեղի են ունենում»։ 

Aysor.am-ը կրկին կապ է հաստատել Հայր Սահակի հետ։ Նա պնդել է, որ Ալեն Սիմոնյանին չի ուղեկցել, ընդամենը քայլել է նրա հետ։

«Ոմանց համար, գուցե, դա ուղեկցում է, ես ընդամենը քայլել եմ, բարևել եմ ու ընդհանուր խմբով ներս ենք գնացել»,- ասել է Հայր Սուրբը։

Հայր Սահակը մինչև մեքնենա չի ուղեկցել Ալեն Սիմոնյանին, ինչպես պնդել էր ԱԺ նախագահը. «Ձիանոց կոչվող տարածք կա, այդտեղից հրաժեշտ եմ տվել»։

«Չգիտեմ՝ գուցե այդ հանդիպումն իր համար ջերմ էր, բայց իմ Արցախը տալուց հետո ես ոչ մեկի հետ ջերմ շփման եզր չունեմ»,- ասել է Տաթևի վանական համալիրի վանահայրը։