ՌԴ ԱԴԾ-ն կանխել է Ռուսաստանի բարձրաստիճան պաշտոնյաներից մեկի սպանությունը

ՌԴ ԱԴԾ-ն հայտարարել է, որ կանխել է Ուկրաինայի հետախուզական ծառայությունների կողմից ծրագրված ռուս բարձրաստիճան պաշտոնյայի սպանությունը։

Այս մասին գրում է Ria.ru-ն:

«Դաշնային անվտանգության ծառայությունը (ԱԴԾ) կանխել է Ուկրաինայի հետախուզական ծառայությունների կողմից ծրագրված ահաբեկչական հարձակումը ռուս բարձրաստիճան պաշտոնյայի դեմ, երբ նա այցելում էր Տրոեկուրովսկոյե գերեզմանատանը գտնվող մերձավոր ազգականների թաղման վայրը», - ասվում է հայտարարության մեջ։

Ստացված տեղեկությունների համաձայն՝ Ուկրաինան մի քանի մարդ է հավաքագրել հանցագործությունը նախապատրաստելու համար։

«Մոսկվայում ձերբակալված Կենտրոնական Ասիայից անօրինական միգրանտը և նախկինում դատապարտված թմրամոլ Ռուսաստանի երկու քաղաքացիներ, ինչպես նաև Կիևի բնակիչ, 1979 թվականին ծնված Ջալոլիդին Կուրբանովիչ Շամսովը հետախուզվում են Ռուսաստանի իրավապահ մարմինների կողմից սպանության և զենքի անօրինական շրջանառության համար», - պարզաբանել է գործակալությունը։

Ձերբակալվածներից մեկի խոսքով՝ նա և իր ամուսինը Մոսկվա են մեկնել այն բանից հետո, երբ ոմն Ռուսլան կապ է հաստատել իր հետ և առաջարկել է որոշակի աշխատանքներ կատարել թմրանյութի դիմաց:

ԱԴԾ-ն նշել է, որ Կիևի ռեժիմը՝ արևմտյան երկրների ղեկավարությամբ, նմանատիպ հանցագործություններ է պլանավորում Ռուսաստանի այլ շրջաններում։ Այս ֆոնին նրանք հիշեցրել են օտարերկրյա պետության կամ կազմակերպության հետ գաղտնի համագործակցության համար քրեական պատասխանատվության մասին։