Վարորդներին տուգանում են մեքենայում հզոր «դինամիկ» ունենալու համար. ՔՊ-ականների հեղինակած օրենքն ակտիվ կիրառում են

Քաղաքացիներն ահազանգում են՝ տուգանվել են, քանի որ մեքենայում ունեցել են ոչ գործարանային բարձրախոսներ։ Ֆեյսբուքյան խմբերից մեկում քննարկումները ցույց տվեցին, որ տուգանվածների թիվը հասնում է մի քանի տասնյակի։

«Մեքենան վարելու ընթացքում երգ չեմ լսել, մագնիտոֆոնը միացրած չի եղել։ Կանգնեցրեցին։ Ասեցին՝ բեռնախցիկը բացի։ Բացեցի։ Տեսան բուֆեր, տարան տուգանային հրապարակ։ 10 հազար դրամ տուգանեցին։ Բուֆեր, դինամիկ, ուսիլիտելն էլ հանել են, որ առգրավեն։ Նման բան կա՞»,-պատմել է վարորդներից մեկը։

Վարորդները տարակուսած են, որևէ երկրում նման տուգանք չկա։

Հիշեցնենք, որ հոկտեմբերի 2-ին Ազգային ժողովն ընդունել է ԱԺ ՔՊ-ական պատգամավորներ Ալեն Սիմոնյանի, Սերգեյ Բագրատյանի, Հասմիկ Հակոբյանի և Արուսյակ Ջուլհակյանի հեղինակած «Ճանապարհային երթևեկության անվտանգության ապահովման մասին» օրենքում լրացում կատարելու մասին և «Վարչական իրավախախտումների վերաբերյալ» օրենսգրքում փոփոխություն կատարելու մասին օրենքները։

«Ճանապարհային երթևեկության անվտանգության ապահովման մասին» օրենքի լրացումով արգելվում է տրանսպորտային միջոցներում տեղադրել ստանդարտին չհամապատասխանող խլացուցիչներ կամ նվագարկիչների լրացուցիչ ուժեղացուցիչներ կամ բարձրախոսներ:

Միաժամանակ, Վարչական իրավախախտումների վերաբերյալ Հայաստանի Հանրապետության օրենսգրքի 123.1-ին հոդվածով պատասխանատվություն է նախատեսվել նաև տրանսպորտային միջոցներում ստանդարտին չհամապատասխանող խլացուցիչներ կամ նվագարկիչների լրացուցիչ ուժեղացուցիչներ կամ բարձրախոսներ (բացառությամբ հակաառևանգման ազդանշանային համակարգեր և հավաքների կամ հանրային միջոցառումների դեպքում՝ բարձրախոսներ) տեղադրելու կամ դրանք տեղադրված վիճակում վարելու կամ շարժման ընթացքում դրանք օգտագործելու համար, որը առաջացնում է տուգանքի նշանակում՝ սահմանված նվազագույն աշխատավարձի տասնապատիկի չափով և տուգանային միավորի կիրառում՝ երկու միավոր՝ ստանդարտներին չհամապատասխանող խլացուցիչների կամ նվագարկիչների լրացուցիչ ուժեղացուցիչների կամ բարձրախոսների բռնագրավմամբ: