Հերքման եւ վնասի փոխհատուցման պահանջով․ ԱԳ նախարարը դատի է տվել Հայկ Դեմոյանին. «Ժողովուրդ»

«Ժողովուրդ» օրաթերթը գրում է.

««Ժողովուրդ» օրաթերթը Դատական տեղեկատվական համակարգից տեղեկանում է, որ ՀՀ արտաքին գործերի նախարար Արարատ Միրզոյանը դատի է տվել Ցեղասպանության թանգարան-ինստիտուտի նախկին տնօրեն, պատմական գիտությունների դոկտոր Հայկ Դեմոյանին։

Բանն այն է, որ Դեմոյանը ArmLur.am-ի տաղավարում հնչեցրել էր Հայոց ցեղասպանության թանգարան-ինստիտուտից գրքերի անհետանալու համար ենթադրյալ մեղավորների անունները։

Հարցազրույցը հրապարակվել էր հետեւյալ վերտառությամբ՝ «Թանգարանից գողացված գրքերի գործով ԱԳ նախարարից եւ պատգամավորից բացի կա եւս մեկը. ով է նա»։

Դատալեքսից տեղեկանում ենք, որ Ա. Միրզոյանը Դեմոյանին պարտավորեցրել է հրապարակայնորեն հերքել Armlur TV-ի յութուբյան ալիքում հրապարակված՝ «Թանգարանից գողացված գրքերի գործով ԱԳ նախարարից եւ պատգամավորից բացի կա եւս մեկը. ով է նա» վերտառությամբ տեսանյութում արված հայտարարության մեջ արված հետեւյալ տեքստերը. «Այդ ժամանակ կազմակերպված հանցագործության բաժնի աշխատակիցները մի քանի անգամ հարցաքննության էին տարել նաեւ թանգարանի ասպիրանտներին։ Ինչու, որովհետեւ եղավ մեկ հեռախոսազանգ։ Զանգահարեց ինձ նախկին տնօրեն Լավրենտի Բարսեղյանը եւ, վրդովված տոնով, ասեց՝ ինչո՞ւ եմ ես քրեական գործ հարուցել էդ գրքերի համար, էդ գրքերը գողացել են: Ես անակնկալի եկա, ասեցի՝ պարո՛ն Բարսեղյան, բա որ գողացել են, ինչո՞ւ քրեական գործ չեք հարուցել: Ասեց, թե չենք ուզում աղմուկ լինի, եւ պարզ տեքստով հայտնեց, որ գողացել են ասպիրանտները…. Այդ ժամանակ թանգարարանում մի քանի հոգի են եղել ասպիրանտներ: Երկուսին ես հետագայում կիմանամ, թե ովքեր են: Այդ պահին ես չէի ճանաչում ո՛չ Վլադիմիր Վարդանյանին, ով այս պահին Ազգային ժողովի Պետաիրավական հարցերի մշտական հանձնաժողովի նախագահն է, եւ ո՛չ նախկին Ազգային ժողովի նախագահ, ներկա պահին արտգործնախարար Արարատ Միրզոյանին։ Հիմա եկեք էսպիսի մի դրվագ պատկերացնենք. երկուսին տանում են, ես չեմ ճանաչում իրենց, բայց ես ստիպված քրեական գործ եմ հարուցել: Հարցաքննում են, իմ ունեցած կցկտուր փաստացի տվյալներից մեկը այն է, որ Արարատ Միրզոյանը փորձել է թանգարանի աշխատակցուհիներից մեկի վրա բարդել գողության մեղքը ….»։ (Տասնյոթն անց երեսունվեց րոպեին նշում է) «…. Երկու բախտորոշ փաստաթուղթ է հրապարակվելու, աշխատում են էդ ուղղությամբ: Դուք էս փուլում, էս պատմական, բախտորոշ փուլում, եթե չեք պարզում, չեք ուզում մաքրվել եւ հասկանալ՝ էս երկու անձը ովքեր են (ովքեր միգուցե կասկածվում են հանցագործություններ կատարելու մեջ), դուք թույլ եք տալիս, որ ձեր եւ ձեր երեխաների ապագան որոշեն մարդիկ, ովքեր գոնե էս փուլում կասկածվում են։ Ուրեմն երկու հազար յոթի հարուցված քրեական գործի ցուցմունքները կան՝ որպես կարեւոր փաստաթուղթ, որն առնչվում է Հայաստանի անվտանգությանը. սա նաեւ դիմում է Ազգային Անվտանգության Ծառայությանը: Հրապարակե՛ք Արարատ Միրզոյանի եւ Վլադիմիր Վարդանյանի հարցաքննության տեքստերը։ Սա հրապարակման համար պարտադի՛ր է»:

Արարատ Միրզոյանը Հայկ Դեմոյանին պարտավորեցրել է, բացի հերքումից, որպես զրպարտություն համարվող փաստացի տվյալների հետեւանքով պատճառված վնասի փոխհատուցում բռնագանձել սահմանված նվազագույն աշխատավարձի 3000-պատիկի չափով՝ 3 մլն դրամ։

Մեկ այլ հայցադիմումով Կրթության, գիտության, մշակույթի եւ սպորտի նախարարությունը եւ ֆիզիկական անձ Ժաննա Անդրեասյանը Հայկ Դեմոյանից պահանջում են համապատասխանաբար 6 մլն եւ 3 մլն դրամ։

Նախարարությունը եւ նախարար Ժաննա Անդրեասյանը պահաջում են զրպարտություն պարունակող հրապարակումները հրապարակայնորեն հերքել, ներողություն խնդրել, պատվին, արժանապատվությանը եւ գործարար համբավին պատճառված ոչ նյութական վնասը հատուցել։

Սակայն նախարարության եւ Ժաննա Անդրեասյանի հայցադիմումը վերադարձվել է, քանի որ մի ամբողջ կառույց թերի հայցադիմում է ներկայացրել»։

Մանրամասները՝ «Ժողովուրդ» օրաթերթի այսօրվա համարում: