Քստմնելի և զզվելի է, երբ ունեցվածքդ փրկելու համար ծնկի ես իջնում երկիրը թշնամուն հանձնողի առաջ․ հայր և որդի Զաքարյանների «խոնարհումը» (լուսանկարներ)

Այս նկարում ավագ և կրտսեր Զաքարյաններն են՝ Նիկոլ Փաշինյանի երկու կողմերում։

Լուսանկարը գուցե այդքան տհաճ տպավորություն չթողներ ու, տեսարանն այդքան զզվելի չլիներ, եթե  Նիկոլի կողքին նրանց հայտնվելն այդքան քստմնելի ու էժանագին քայլ չդիտվեր։

Ավագն Իշխան Զաքարյանն է, ով 2021 թ․ ընտրվել է ԱԺ պատգամավոր՝ «Պատիվ ունեմ» դաշինքի ցուցակով։ 2025 թ-ին լքել է ընդդիմադիր խմբակցությունն ու դարձել անկախ պատգամավոր։

Մյուսը՝ կրտսերը, Իշխանի որդին է՝  Վարդան Զաքարյանը, ով ընթացիկ տարվա սկզբին ընտրվել է Հայաստանի թենիսի ֆեդերացիայի նախագահ (ՀԹՖ):

Իշխան Զաքարյանի դիրքորոշումները, մեղմ ասած, մի քիչ բարդ են և ցույց են տալիս որոշ հակասություններ։ 

Դեռ ոչ վաղ անցյալում նա հանդես էր գալիս ընդդիմադիր դիրքերից ու հայտարարում, որ «ամեն հայ պետք է շատ լավ իմանա իր պատմությունը»։ Բայց, երբ դատական հայցերն սկսեցին թակել նրա դուռն ու ապտակեցին Զաքարյանին, նա արագ «սթափվեց» ու «հասկացավ»՝ պետք է լքել ընդդիմադիրների շարքերը։

Քրեական գործերից «կողմնորոշված» Զաքարյանը որոշեց որ այլևս էկրաններին չպետք է երևալ, ընդդիմության նախաձեռնություններին չի կարելի միանալ ու, ընդհանրապես, պետք է լռել։ Ու քանի որ անսկզբունքային էր՝ սկսեց մտածել՝ ի՞նչ հայրենիք, ի՞նչ բան․․․, հայրենիքից շատ ու դրանից առավել, ես իմ անձնական պատմությունն ու ունեցվածքն եմ սիրում։

Նկատենք, որ Զաքարյանի քրգործերը կապված էին փողերի լվացման, պաշտոնի չարաշահման ու կոռուպցիոն այլ սխեմաների հետ։ Հիմա գործերը կարճվել են՝ դատախազության որոշմամբ։ Նա այլևս մեղադրյալ չէ։

Միևնույն ժամանակ,  Զաքարյանի նկատմամբ դեռևս կան դատական պահանջներ՝ ապօրինի գույքի բռնագանձման մասով։ Բռնագանձման պահանջների շուրջ դատական գործով, «կողմերի միջև հաշտության ակտիվ բանակցություններ են ընթանում»։ 

Այլ կերպ ասած՝ Նիկոլի կողքին Զաքարյանի ակտիվությունը զուտ «տեխնիկական և ինստիտուցիոնալ» բնույթ է կրում․ նա կառուցողական է՝ «հաջող» կապեր ձևավորելու և Փաշինյանի հետ միջանձնային հարաբերություններում «խոնարհություն» ցույց տալու գործում։

Ինչ վերաբերում է Իշխանի որդի Վարդանին, ապա Զաքարյանի ընտանիքին վերաբերող գործի մեջ՝ ապօրինի ծագում ունեցող գույքի բռնագանձման պահանջի մասով, նա ևս ընդգրկված է։ Այսինքն՝ նրա ֆինանսական կայունությունը կախված է հոր ֆինանսական կայունությունից, իսկ այս երկուսի լինելիության հարցը կապված է Նիկոլի քմահաճության հետ։ Դրանով է թերևս բացատրվում, հայր և որդի Զաքարյանի քստմնելի վերաբերմունքն ու սիրառատ հայացքները՝ ուղղված Նիկոլին։

Ու այս է պատճառը, որ զզվելի են այս նկարներն ու, առհասարակ, երևույթը, որովհետև երկիրը կապիտուլյացիայի ենթարկած, հայրենիքը թշնամուն հանձնած ու դավաճանության մեջ մեղադրվող իշխանության կողքին կանգնելն աններելի է ու չի կարող արդարացվել ոչ մի պարագայում։ Իսկ առավել ևս ծնկի գալը՝ զուտ ունեցվածքը փրկելու համար, պարզապես գարշելի է։

Արմինե Մկրտումյան