Այո, խաղաղության պայմանագիրը կստորագրեմ, ինչի՞ չեմ ստորագրի, բայց պայմանով․ Արման Թաթոյան

«Ադրբեջանի հետ այսօրվա հարաբերություններն ի՞նչ են։ Ստորանալու, նվաստանալու միջոցով ամեն ինչ տալ, ինչ ուզում է, տալ։ Սա վատ տեղ տանող ճանապարհ է, էլ բան չի մնացել, որ տանք Ադրբեջանին»։ Լրագրողների հետ այսօրվա հանդիպմանը հայտարարեց «Միասնության թևեր» քաղաքական ուժի հիմնադիր Արման Թաթոյանը։

Նա ընդգծում է, որ սա այն պարագայում, երբ Ադրբեջանի պես կանախատեսելի գործընկեր, որ հայտարարում է մեր նկատմամաբ թշնամական լինելու մասին, էլ չկա։

«Ադերբեջանի նախագահը պարզ ասում է՝ ձեզ հետ ինչ է լինելու, թե ինքն ինչ նպատակներ ունի։ Հետևաբար, մենք պետք է միավորված, անվտանգության համակարգը զարգացրած, ուժեղ տնտեսությամբ, արժանապատիվ երկրով, վստահելի միջազգային գործընկերնորվ պետք է այնպես անել, որ Ադրբեջանը չկարողանա այդպես խոսել, նվաստացած պահել մեր ժողովրդին»,-ասաց Թաթոյանը։

Անդրադառնալով հարցին, թե հնարավո՞ր է խորհրդարանական ընտրություններում ընտրվելուց հետո Արման Թաթոյանը ստորագրի խաղաղության պայմանագիրը, նա արձագանքեց՝ կստորագրի։

«Այո, խաղաղության պայմանագիրը կստորագրեմ, ինչի՞ չեմ ստորագրի։ Բայց առաջինն Ադրբեջանի նախագահը թող  ստորագրի։ Ադրբեջանի նախագահը կստորագրի, միանգամից, նույն րոպեին ես կստորագրեմ։ Բայց եկեք մի հատ հասկանանք, այդ խաղաղության պայմանագիրը մեզ ի՞նչ է տալիս, պահվելու է, թե՞ չէ։ Դեռ չստորագրված Ադրբեջանի նախագահը դուրս է գալիս ԱՄՆ նախագահի հետ ու հայտարարում է, որ Հայաստանը պետք է փոխի իր երկրի Սահմանադրությունը, այն պայմաններում, երբ այդ պայմանագրում գրած է, երկրները չեն խառնվում միմյանց ներքին գործերին։ Հիմա Հայաստանը պե՞տք է Սահմանդրություն փոխի Ադրբեջանի պահանջով։ Ո՛չ։ Նման բան չկա։ Ես Ադրբեջանի պահանջով, երբեք Սահմանդրություն չեմ փոխելու»,-ասաց Թաթոյանը։

Նա ընդգծեց, իր համար խաղաղության պայմանագիրը TRIPP-ի պայմանագիրն է։

«Մենք պետք է ԱՄՆ պես հզոր երկրի  միջնորդական առաքելությունն այնպես օգտագործենք, որ ծառայի մեր երկրի շահերին։ Փաշինյանն այսօր ամբողջությամբ մսխում է ամերիկյան այս հզորագույն միջնորդությունը։ Ո՞նց կարելի է նման բան անել։ Նա օգնում է Ադրբեջանին կոծկել նրա քայլերն ու հեղինակազրկում է ԱՄՆ միջնորդական առաքելությունը»,-ասաց նա։