Եթե ես չեմ՝ դու էլ չպետք է լինես. ավելի լավ է Նիկոլը մնա. ընդդիմության աթոռատենչությունը երկիրը տանում է կործանման ու նոր «դուխ» տալիս Նիկոլին

Հայաստանում ընդդիմադիրները, ինչպես ժողովուրդն է ասում, էշի ականջին քնած են: Ավելի ճիշտ՝ խոսում են, ճառեր ասում, բացատրում, թե ինչպես պետք է հեռացնել իրեն երկրի վարչապետ հռչակած և երկիրը թշնամուն հանձնող Նիկոլ Փաշինյանին, բայց միայն խոսում են: Ու, դարձյալ ժողովրդի լեզվով ասած, ճառ ասող՝ ինչքան ուզես, զանգ կախող՝ ոչ ոք չկա:

Հայաստանում ընդդիմադիր դաշտը շատ մասնատված է՝ տարբեր ուժեր ունեն տարբեր օրակարգեր, հաճախ փոխադարձ անվստահություն և մրցակցություն։ Սա նվազեցնում է համակարգված, միասնական գործողությունների հնարավորությունը։ Այս մրցավազքը թերևս կարելի է առողջ համարել, եթե դրա նապատակը լիներ՝  Փաշինյանին հեռացնել՝ երկիրը փրկելու համար, և ոչ թե՝ Փաշինյանին հեռացնել՝ աթոռը տիրելու համար:

Այլ կերպ ասած՝ ընդդիմադիրների մոտ այս կարգախոսն է՝ եթե ես չեմ, ուրեմն դու ևս չես լինելու՝ ավելի լավ է Նիկոլը մնա:

Հասարակությունը սա լավ է հասկանում. ավելի ճիշտ՝ գոնե այս փուլում արդեն հասկացել է, որ ընդդիմադիրները վազում են աթոռի հետևից ու «միկրոֆոն փախցնում իրար ձեռքից»: Այդ է պատճառը, որ  ընդդիմադիր ուժերը հաճախ չունեն բավարար վստահություն հասարակության լայն շերտերի շրջանում։

Բայց մեշաշավալ շարժումները պայմանավորված է ոչ միայն վերոգրյալով, այլև հասարակության մեջ դեռ հետպատերազմյան հոգեբանական և սոցիալական ֆոն կա: 2020-ի պատերազմից հետո հասարակության մեծ մասը հոգնած է քաղաքական բախումներից։ Հատկապես, երբ զգում են, որ  խաբում են իրենց:

Սա ամբողջ քաղաքական դաշտը դարձնում է պասիվ։

Բողոքի գործողությունները բարդանում են նաև ուժային կառույցների ճնշումների, ձերբակալությունների կամ հետապնդումների վախի պատճառով։

Բացի այդ, ընդդիմությունը չունի հստակ ծրագիր՝ իշխանափոխությունից հետո ինչ անել, ինչպես կառավարել երկիրը, ինչ արտաքին քաղաքականություն վարել։ Առանց դրանից բողոքները լայն զանգվածի չեն ձգում։

Մյուս կողմից էլ Նիկոլն սկսել է օգտագործել իր նոր զենքը՝ այն ուղղելով եկեղեցու կողմը:

Ու այս ամենը կշարունակվի այնքան ու, երկիրը կգնա կործանման, քանի դեռ ընդդիմադիր դաշտը կմնա մասնատված ու իր ծրագրերը կկառուցի ոչ թե երկիր փրկելու, այլ իշխանությունն իր ձեռքը գցելու շուրջ:

Մի խոսքով՝  ընդդիմության աթոռատենչությունը երկիրը տանում է  կործանման և նոր «դուխ» տալիս Նիկոլին:

Արմինե Մկրտումյան