Մեղադրանքի հիմքերը շինծու են, իսկ Տիգրան Ուլուբաբյանի դեմ գործը՝ բացառապես պատժիչ բնույթ է կրում․ պաշտպան

Դեկտեմբերի 1-ին Վանաձոր քաղաքում կայացել է Տիգրան Ուլուբաբյանի քրեական գործով հերթական դատական նիստը։ Նիստի ընթացքում դատարանում շարունակվել է տուժող Քրիստինե Բեգլարյանի հարցաքննությունը։ Իր ցուցմունքում տուժողը պատասխանել է իմ հարցին, թե ինչու է, իր կարծիքով, Տիգրան Ուլուբաբյանը նստած մեղադրյալի աթոռին։ Այս մասին հայտնում է Ուլուբաբյանի պաշտպան Էրիկ Բեգլարյանը։ 

«Քրիստինե Բեգլարյանը նշել է, որ Տիգրանի նկատմամբ իրականացվում է բացահայտ հաշվեհարդար՝ պայմանավորված նրանով, որ նա հրապարակային է դարձրել ոստիկանների կողմից իր նկատմամբ կիրառված բռնությունը, ինչպես նաև կազմակերպել է բողոքի ակցիաներ և հանրային հավաքներ։ Տուժողի խոսքով՝ հենց այս հանգամանքներն են ստացել մեծ հնչողություն և դարձել Տիգրանի դեմ հարուցված գործի իրական շարժառիթը։

Քրիստինեն հավելել է, որ Տիգրանը  ֆինանսական որևէ կարիք չի ունեցել, քանի որ  ամսական ստանում էր 330 000 ՀՀ դրամ։ Նա նշել է նաև, որ իր մոտից հափշտակվել են 800 000 ՀՀ դրամ արժողությամբ ոսկյա զարդեր, և եթե, ինչպես մեղադրանքն է նշում, հանցագործությանը ներգրավված են եղել 4 անձ, ապա գումարի բաժանման դեպքում յուրաքանչյուրին բաժին կհասներ մոտ 200 000 դրամ։

Տուժողի խոսքով՝ դա միանշանակ անհեռանկարային և անհեթեթ մոտիվ է․ Տիգրանը,նախ երբեք չէր գնա նման քայլի,առավել ևս 200 000 դրամի համար, նրա ֆինանսական վիճակը նման քայլի դրդելու պատճառ չի կարող լինել։

Բացի այդ, տուժողը կրկին ընդգծել է, որ եթե Տիգրանին երբևէ գումար անհրաժեշտ լիներ, ինքը՝ որպես ընտանիքի մտերիմ մարդ, անպայման կօգներ իրեն հնարավորության սահմաններում։ Նրա համոզմամբ՝ մեղադրանքի հիմքերը շինծու են, իսկ Տիգրանի դեմ գործը՝ բացառապես պատժիչ բնույթ է կրում։

Տեղեկացնում եմ,որ Տիգրան Ուլուբաբյանի վերաբերյալ հաջորդ նիստը տեղի կունենա դեկտեմբերի 18-ին ժամը 15։00‐ին  Վանաձոր քաղաքում»,- գրել է նա։