Այս օրը թող դառնա ոչ միայն հիշողություն, այլև նոր պարտավորություն՝ մեր երկիրը վերածնելու. «ՔՈՉԱՐԻ» կուսակցութան ուղերձը՝ երկրաշարժի 37-րդ տարելիցի կապակցությամբ

«ՔՈՉԱՐԻ - Ազգային Վերածննդ և Ազգի Զարթոնք» կուսակցությունը ուղերձ է հղել Սպիտակի երկրաշարժի 37-րդ տարելիցի կապակցությամբ:

Ուղեձում մասնավորապես ասվում է.

«Այսօր՝ դեկտեմբերի 7-ին, մենք կանգնած ենք մեր ժողովրդի հիշողության ամենածանր և անմարելի էջերից մեկի առաջ։ 1988 թվականի Սպիտակի երկրաշարժը խլեց տասնյակ հազարավոր կյանքեր, հյուսեց հազարավոր ցավեր և փոխեց մեր երկրի ճակատագիրը։

1988 թվականի դեկտեմբերի 7-ը մեր ժողովրդի պատմության ամենածանր էջերից մեկն է։ Այդ օրը Սպիտակում, Լենինականում, Կիրովականում և տասնյակ համայնքներում կործանարար երկրաշարժը խլեց շուրջ 25.000 անմեղ կյանք, տասնյակ հազարավոր ընտանիքներ մնացին անօթևան, իսկ երկիրը ցավի ու փորձության մեջ հայտնվեց։

«ՔՈՉԱՐԻ — Ազգային Վերածնունդ և Ազգի Զարթոնք» կուսակցությունը հարգանքով խոնարհվում է այդ օրվա զոհերի հիշատակի առաջ։ Մենք զորակցում ենք բոլոր այն ընտանիքներին, ովքեր մինչ այսօր կրում են այդ ցավի անմար վիշտը։

Այս օրը հիշեցնում է, որ ազգային միասնությունը, պատրաստվածությունը և պատասխանատվությունը պետք է լինեն պետության հիմքը։ Հայաստանը պարտավոր է վերաձևակերպել իր անվտանգության, քաղաքաշինության և աղետների կանխարգելման համակարգերը՝ երբեք չկրկնելու համար այն, ինչ ապրեցինք 1988-ին։

Սպիտակի երկրաշարժից անցել է ավելի քան երեք տասնամյակ, սակայն Հայաստանի իշխանությունները՝ տարբեր կազմերով, չկարողացան ավարտին հասցնել աղետի գոտու լիարժեք վերականգնումը։

Ընդգծում ենք պետական անգործության հիմնական թերացումները.

Աղետի գոտին ամբողջությամբ չի վերակառուցվել։ Հարյուրավոր ընտանիքներ շարունակում են ապրել ժամանակավոր և ոչ անվտանգ պայմաններում՝ ապշեցնող պետական անտարբերության պայմաններում։

Սեյսմիկ անվտանգությունը համակարգային չի դարձել։ Երեք տասնամյակ շարունակ իշխանությունները խոստացել են կատարել սեյսմիկ ամրացման ծրագրեր, սակայն դրանց մեծ մասը մնացել է թղթի վրա։

Կրիտիկական ենթակառուցվածքների նախապատրաստումը բավարար չէ։ Դպրոցների, հիվանդանոցների, պետական շենքերի զգալի մասը դեռևս չի համապատասխանում սեյսմիկ անվտանգության չափանիշներին։

Աղետների կառավարման համակարգը ձևական է։ Փրկարար ծառայությունները չեն ստացել անհրաժեշտ տեխնիկա, սարքավորումներ և ֆինանսավորում, ինչը մեզ դարձնում է խոցելի նոր աղետների դիմաց։

Քաղաքաշինական քաղաքականությունը երկար տարիներ եղել է շահագործման դաշտ, որտեղ ավելի շատ հաղթել են օլիգարխիկ շահերը, քան քաղաքացիների անվտանգությունը։

Հիշատակի օրը հաճախ վերածվել է ձևական արարողությունների, մինչդեռ պետությունը պարտավոր էր իրական պատասխանատվություն վերցնել և ապահովել արդար վերակառուցում։

Կուսակցությունը հայտարարում է, որ այսպիսի մոտեցմամբ Հայաստանը չի կարող ապահով պետություն դառնալ։

Աղետի գոտու չվերականգնումը պետական անհաջողության ամենամեծ խորհրդանիշներից մեկն է։

Այսօր, երբ հիշում ենք զոհերին, մենք պարտավոր ենք ոչ միայն սգալ, այլ նաև քաղել դասերը, քանի որ երկիրը, որտեղ քաղաքաշինությունը, կառավարումը և անվտանգության համակարգերը հիմնված չեն պատասխանատվության վրա, մշտական վտանգի տակ է։

«ՔՈՉԱՐԻ — Ազգային Վերածնունդ և Ազգի Զարթոնք» կուսակցությունը խոստանում է.

ստեղծել սեյսմիկ անվտանգության նոր ազգային ռազմավարություն,

ամբողջությամբ ավարտել աղետի գոտու վերակառուցումը,

ապահովել դպրոցների, մանկապարտեզների, հիվանդանոցների ամրությունը,

ճվերափոխել արտակարգ իրավիճակների ծառայությունը՝ դարձնելով այն լավագույնը տարածաշրջանում,

և ամենակարևորը՝ կառուցել պետություն, որտեղ քաղաքացիների անվտանգությունը ոչ թե խոստում է, այլ ընթացիկ պարտականություն։

Այս օրը թող դառնա ոչ թե միայն հիշողություն, այլև նոր պարտավորություն՝ վերածնելու մեր երկիրը՝ ուժեղ, անվտանգ և միասնական Հայաստան:

ՔՈՉԱՐԻ Ազգային Վերածնունդ և Ազգի Զարթոնք կուսակցություն»: