Նարեկ ջան, ինչի՞ համար ես աշխատավարձ ստանում, եթե անգամ զանգերին չես պատասխանում

ՀՀ ՆԳՆ Շիրակի մարզի ոստիկանության Մուշի բաժնի աշխատակիցներից շատերի շրջանում վարակակիր վիրուս է հայտնվել: Վիրուս՝ բառի ուղիղ  իմաստով: 

NEWSPRESS.am-ի աղբյուրի փոխանցմամբ, ոստիկանության աշխատակիցներից մի քանիսի մոտ հայտնաբերրվել է հելիկոբակտեր պիլորի (Helicobacter pylori):

Նրանք, ովքեր չգիտեն, թե ինչ է դա և ինչից կարող է առաջանալ, բացատրենք՝ սա աղիքային վարակ է, որի առաջացման հիմնական պատճառները կապված են հիգիենայի և շրջակա միջավայրի հետ․

• ոչ լավ լվացված ձեռքեր

• աղտոտված ջուր կամ սնունդ

• վատ սանիտարական պայմաններ

Հելիկոբակտերը կարող է փոխանցվել, օրինակ՝

• եթե մարդը զուգարանից հետո չի լվացել ձեռքերը,

• հետո ձեռքով շփվել է կամ կերակուր է տվել,

• կամ օգտագործվել են նույն սպասքը, գդալը, բաժակը

Դե արդեն հասկանում եք, չէ՞, թե ինչի մասին է խոսքը և ինչ հակասանիտարական վիճակում են աշխատում Մուշի բաժնի ոստիկանները: Այս ամենի դեմն առնելու և կանխարգելիչ միջոցներ ձեռնարկելու փոխարեն, ոստիկանության այս բաժնում փորձում են ոչ միայն այս իրավիճակը ծածկադմփոց անել, այլ բաժինը սարքել, ներեցեք արտահայտության համար, իսկական բարդակ:

NEWSPRESS.am-ի աղբյուրի համաձայն, մոտ մեկ  շաբաթ առաջ ծեծկռտուք է եղել: Մեր տեղեկություններով, այդ ծեծկռտուքի առիթը հասունացել է անձնական հողի վրա ձևավորված որոշ հարաբերություններից, որի մասին այս պահին չենք բարձրաձայնի՝ ելնելով մարդկանց անձնական տարածք չմտնելու էթիկայի կանոններից: 

Վերջին հաշվով, խնդիրն այստեղ այն չէ, թե ինչ տիրույթում է սկսվել վիճաբանությունն ու ծեծկռտուքը, այլ այն, որ օրենքի «պահապաններ» համարվող ու կարգ ու կանոն  հաստատող ոստիկաններն իրենք են ստեղծել խառնաշփոթ:  Անձնական «ժայթքումները» հաղթահարելու և  իրավիճակին արագ լուծում տալու փոխարեն, նրանք հասունացրել են խնդիրը և այն տեղափոխել ոստիկանության բաժին՝ իրար վիրավորելով ու ծեծելով (մեկի եղբորը, մյուսի ընկերոջը...): 

Միջադեպն անձնական դաշտ չտեղափոխելով՝ փորձեցինք դրա մասին պաշտոնական մեկնաբանություն ստանալ ՆԳՆ-ից:

Նախ փորձեցինք կապ հաստատել ՆԳՆ խոսնակ Նարեկ Սարգսյանի հետ: Նա չպատասխանեց զանգերին: Հետո կապ հաստատեցինք  Մուշի բաժնի հերթապահ բաժնի աշխատակցի հետ, բայց վերջինս խնդրեց մեր բոլոր հարցերի պատասխաններն ստանալ Նարեկ Սարգսյանից:

Մենք կիկին փորձեցինք, բայց այդպես էլ նրա հետ կապ հաստատել չհաջողվեց: Թերևս սա ևս խոսում է ՆԳՆ համակարգի բարձիթողի վիճակի մասին: Սարգսյան Նարեկի հետ կապված արդեն մի քանի անգամ եղել է նման դեպք, երբ կապ հաստատել չի հաջողվել, մինչդեռ նա աշխատավարձ է ստանում հենց այն բանի համար, որ պարտավորվել է արձագանքել լրատվամիջոցներին ու մեկնաբանել ՆԳՆ հետ կապված հարցերը:

Եթե  Նարեկ Սարգսյանին թվում է, որ իր կլորիկ աշխատավարձն ստանում է գեղեցիկ աչքերի համար, ապա պետք է հիասթափեցնել նրան, քանի որ Նարեկը պետք է իմանա, որ մի շարք այլ պարտավորությունների հետ մեկտեղ, նա նաև պատասխանատու է Տեղեկատվության կառավարման համար. այսինքն՝

• • Համակարգում է ներքին և արտաքին տեղեկատվության հոսքը՝ ապահովելով ճշգրտություն և անվտանգության կանոնների պահպանություն։

  • Պատասխանում է լրագրողների հարցերին, տրամադրում պաշտոնական մեկնաբանություններ։

Ու եթե այս կետերից որևէ մեկի կատարման գործում ՆԳՆ խոսնակը թերանում է, ապա հարց է առաջնամում՝ ինչի՞ համար է նա աշխատավարձ ստանում:

Արմինե Մկրտումյան