Անհնար է, որ հայկական կողմից արձակված արկերը լինեն. իրանագետ

Արևելյան Ադրբեջան նահանգի իրանական Խոդաֆարին գյուղի շրջանում 3 ականանետային արկ է պայթել, որոնք արձակվել էին Ղարաբաղյան հակամարտության գոտում ընթացող մարտերի ժամանակ: Այս պահին Խոդաֆարին գյուղում զոհերի ու ավերածությունների մասին տեղեկություն չկա։

«Ներկայում Արևելյան Ադրբեջան նահանգի սահմանին անվտանգությունը վերականգնվել է։ Մենք կոշտ կարձագանքենք մեր երկրի տարածքի դեմ ցանկացած ագրեսիայի»,- հայտարարել է նահանգապետը։

Newspress.am-ին իրանագետ Վարդան Ոսկանյանը խնդրի առնչությամբ նշեց, որ հայկական կողմից արձակված չի եղել, քանի որ դա արդեն կնշանակի, որ հայերը կրակում են իրենց թիկունքին, իսկ ադրբեջանցիները հայտնի են իրենց ոչ ճշգրիտ հարվածներով:

«Ինչքան էլ ադրբեջանցիներին սովորեցնես, միևնույն է` չեն կարողանում ճշգրիտ և դիպուկ կրակել. դա իրենց սեփական փնթիության արդյունքն է»,- ասաց իրանագետը, հավելելով, որ մեր մասնագետները վերլուծել են իրավիճակը և նշել, որ անհնար է հայկական կողմից արկեր ընկնեին իրանական կողմ:

Իսկ, ընդհանուր առմամբ, Վ. Ոսկանյանը նշեց, որ իրանական լրատվամիջոցները անկողմնակալ են անդրադառնում ղարաբաղա-ադրբեջանական հակամարտությանը, օգտագործում են նաև հայկական աղբյուրներ, անգամ Ֆարսի գործակալությունը հղում է անում ԼՂՀ Պաշտպանության նախարարության պաշտոնական կայքին: