Բանտապետը, ՄԻՊ-ն ու Գալյանը հետևել են ազատազրկված անձանց ձեռքի աշխատանքների միջոցառմանը

ՀՀ արդարադատության նախարարության «Նուբարաշեն» քրեակատարողական հիմնարկում տեղի է ունեցել մեծ միջոցառում՝ ազատազրկված անձանց ձեռքի աշխատանքների ամանորյա ցուցահանդես-վաճառք։ Միջոցառման ողջ հասույթն ուղղվել է Երևանի ««Զատիկ» երեխաների աջակցության կենտրոն» ՊՈԱԿ-ին։

Բարեգործական տոնավաճառին հաջորդել է բացառիկ համերգային ծրագիր․ հայկական և միջազգային դասական երգերի կատարումներով հանդես են եկել Ա․ Սպենդիարյանի անվան օպերայի և բալետի ազգային ակադեմիական թատրոնի մեներգիչները։

Միջոցառմանը ներկա են եղել ՀՀ արդարադատության նախարար Սրբուհի Գալյանը, նախարարի տեղակալ Գևորգ Քոչարյանը, Քրեակատարողական ծառայության պետ Ծովինար Թադևոսյանը, Մարդու իրավունքների պաշտպան Անահիտ Մանասյանը, Կրթության, գիտության, մշակույթի և սպորտի նախարարի տեղակալ Դանիել Դանիելյանը, Երևանի քաղաքապետարանի մշակույթի և տուրիզմի վարչության պետ Գոշ Սարգսյանը, սպորտի և երիտասարդության հարցերի վարչության պետ Արսեն Մակվեցյանը, Ազգային ժողովի պատգամավոր Ռուստամ Բաքոյանը, ««Զատիկ» երեխաների աջակցության կենտրոն» ՊՈԱԿ-ի տնօրեն Հասմիկ Մանուկյանը, ինչպես նաև Արդարադատության նախարարության, Քրեակատարողական ծառայության, այլ պետական մարմինների ներկայացուցիչներ, քաղաքացիական հասարակության անդամներ, մշակութային գործիչներ և հյուրեր։

Միջոցառման շրջանակում Քրեակատարողական ծառայության պետ Ծովինար Թադևոսյանը շնորհակալագրեր է հանձնել մշակութային և հասարակական կազմակերպություններին ակտիվ և բեղմնավոր համագործակցության համար՝ հույս հայտնելով, որ այն կլինի շարունակական և կունենա նոր զարգացումներ։ Ծովինար Թադևոսյանն առանձնահատուկ ընդգծել է ազատազրկված անձանց ձեռագործ աշխատանքների բարեգործական ցուցահանդես-վաճառքի կարևորությունը նրանց հասարակամետ վարքագծի ձևավորման ու ամրապնդման գործում։

ՀՀ արդարադատության նախարար Սրբուհի Գալյանը շնորհակալություն է հայտնել Ա․ Սպենդիարյանի անվան օպերայի և բալետի ազգային ակադեմիական թատրոնի տնօրեն Կարեն Դուրգարյանին նման բացառիկ նախաձեռնության համար, ինչպես նաև բոլոր հյուրերին՝ ներկա գտնվելու, համագործակցության և մասնակցության համար։ Իր ելույթում նախարարը նշել է, որ արվեստը ինքնաճանաչման և կրթության կարևոր ճանապարհ է, և վերասոցիալականացման այս ուղով անցնելով՝ ազատազրկված անձինք կարող են լիարժեք վերադառնալ հասարակություն։ Նախարարն ընդգծել է, որ պետությունը չի խնայի ջանք ու եռանդ՝ արժանապատիվ պայմաններ և նպաստավոր միջավայր ապահովելու համար վերասոցիալականացման գործընթացում։

Շնորհավորական խոսքերով հանդես են եկել նաև միջոցառման հյուրերը։

Միջոցառման ավարտին Սրբուհի Գալյանի և Ծովինար Թադևոսյանի ուղեկցությամբ հյուրերը շրջայց են կատարել «Նուբարաշեն» քրեակատարողական հիմնարկում, որի ընթացքում նրանց ներկայացվել են հիմնարկում իրականացված տեղային բարեկարգման և շինվերանորոգման աշխատանքները, ինչպես նաև հանրակրթական և վերասոցիալականացման գործընթացները։