Ամանորի նախաշեմին սոցցանցերում ակտիվացել են կեղծ խաղարկությունները

CivilNet-ը գրում է.

Ամանորյա շրջանում, երբ բազմաթիվ ընկերություններ անցկացնում են խաղարկություններ և առաջարկում են մեծ զեղչեր, ակտիվանում են նաև զեղծարարները։ Օգտվելով իրավիճակից՝ նրանք սոցիալական ցանցերում տարածում են կեղծ գրառումներ հայտնի ընկերությունների անունից․ օրինակ՝ իբր Nissan-ը և Toyota-ն Սուրբ Ծննդյան կապակցությամբ մեքենաներ են նվիրում, իսկ Coca-Cola-ն մրցանակներ է խոստանում նկարում պատկերված ճիշտ թիվը գուշակողներին և նմանատիպ այլ խաբուսիկ առաջարկներ։

«Այս տարի Սուրբ Ծնունդը նշելու համար #Toyota-ն ցանկանում է ուրախությունը կիսել իր բոլոր հետևորդների հետ։ Մենք նվիրում ենք 5 նոր Toyota մեքենա։ Ընտրեք ձեր նախընտրած գույնը, օրինակ՝ «Կարմիր»»,- նշված է Toyota-ի անունից տարածված գրառման մեջ։

*Էկրանապատկերը՝ կեղծ գրառումներ տարածած ֆեյսբուքյան էջերից*

Մինչդեռ, այս գրառումները կեղծ են, որոնց միակ նպատակը օգտատերերի անձնական կամ բանկային տվյալները կորզելն է։

Խաղարկությունները կեղծ էջերի միակ ակտիվությունը

Դեկտեմբերի 24-ին ստեղծված Toyota-Hilux’fans. անվանումով ֆեյսբուքյան էջում նույն օրը հրապարակվել է խաղարկության վերաբերյալ գրառում։ Սա էջի միակ ակտիվությունն է, որը, սակայն, մի քանի ժամվա ընթացքում հասցրել է ավելի քան 300 տարածում (share) ստանալ։

*Էկրանապատկերը՝ Toyota-Hilux’fans. անվանումով ֆեյսբուքյան էջից*

Բացի Toyota-ից, նմանատիպ գրառումներ են հրապարակվել նաև այլ ընկերությունների անունով ստեղծված ֆեյսբուքյան էջերի միջոցով, որոնք ևս ունեն մեծ թվով տարածումներ և մեկնաբանություններ։ Այս ֆեյսբուքյան էջերը ողողված են բացառապես խաղարկությունների և նվերների վերաբերյալ հրապարակումներով։ Բոլոր դեպքերում մասնակցության պայմանները չափազանց պարզ են․ մեկնաբանել գրառումը, տարածել այն 10-15 ֆեյսբուքյան էջում և այլն։

Գրառումները մեկնաբանելուց հետո օգտատերերին ուղարկվող նամակները գրեթե նույնությամբ կրկնում են միմյանց։ Օրինակ՝ Kia Dealer և «Փոքրիկ տուն» անվանումներով ֆեյսբուքյան էջերի գրառումները մեկնաբանելուց հետո ուղարկվել է նույն բովանդակությամբ նամակ, ինչը փաստում է, որ այդ էջերը կառավարվում են նույն կենտրոնից։

*Էկրանապատկերը՝ Kia Dealer և «Փոքրիկ տուն» ֆեյսբուքյան էջերի հետ նամակագրությունից*

Չնայած դրան, հայտնի չէ՝ այդ էջերը կառավարվում են Հայաստանից, թե Հայաստանի սահմաններից դուրս։

Հատկանշական է նաև, որ դեկտեմբերի 2-ից սոցիալական ցանցերում տարածվում է գրառում գերմանական «Լիդլ» սուպերմարկետների ցանցի անունից։ Գրառման մեջ կրկին նույն սխեմայով առաջարկվում է գուշակել ճիշտ թիվը, որի դիմաց «հաջողակ» մասնակիցը կարող է ստանալ անակնկալ պայուսակ։ Թեև գրառմանը հավատացած օգտատերերի թիվը մեծ է, և այն հարյուրավոր տարածումներ ունի, զեղծարարները հաշվի չեն առել մի կարևոր փաստ․ «Լիդլ» սուպերմարկետների ցանցը Հայաստանում չի գործում։

*Էկրանապատկերը՝ Lidl.fans անվանումով կեղծ ֆեյսբուքյան էջից*

Նմանատիպ գրառումները մեկնաբանելուց և ֆեյսբուքյան խմբերում տարածելուց հետո օգտատերերին ուղարկվում է ընկերության պաշտոնական կայքին նմանակող կեղծ կայքի հղում։ Իրականում այդ կայքը ֆիշինգային է, որի միջոցով զեղծարարները փորձում են կորզել օգտատերերի անձնական կամ բանկային տվյալները։