Հայ Եկեղեցին հալածվում է, բայց չարից վախենալ պետք չէ․ Շիրակի թեմում աղոթք բարձրացվեց

Դեկտեմբերի 25-ին, Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանի և թեմի հոգևոր տեսուչ Գերաշնորհ տեր Նարեկ եպիսկոպոս Ավագյանի օրհնությամբ Սուրբ Ստեփանոս Նախավկայի հիշատակության օրվան նվիրված`Ազատան համայնքի մուտքից ուխտավորները միախորհուրդ աղոթքներով և շարականներով, խաչ- խաչվառների թափորով և Սուրբ Ստեփանոս Նախավկայի Մասունքով շարժվեցին Սուրբ Հարություն (Սուրբ Ստեփանոս) եկեղեցի՝ միասնական աղոթք բարձրացնելով Հայոց Հայրապետի արևշատության, Հայ Առաքելական Սուրբ Եկեղեցու անսասանության, ապօրինի անազատության մեջ գտնվող Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանի, Բագրատ, Մկրտիչ և Արշակ Սրբազանների, Տեր Գարեգին քահանայի և մյուս ապօրինի կալանավորվածների համար, հայտնում են Հայ Առաքելական եկեղեցու Շիրակի թեմից։

Նշվում է, որ Ազատանի Սուրբ Ստեփանոս (Սուրբ Հարություն) եկեղեցում մատուցվեց Ուխտի Սուրբ Պատարագ՝ ձեռամբ Շիրակի թեմի Ազատանի հովվության հոգևոր հովիվ Տեր Մակար քահանա Գալամդարյանի:

«Քրիստոսի հաղթանակը ամեն անգամ վերհաստատվում է, վերհաստատվում է, որ Քրիստոս Իր Հարությամբ հաղթանակ է տարել չարի նկատմամբ, հաղթանակ է տարել մահվան նկատմամբ: Եվ այսօր՝ Սուրբ Ստեփանոսի տոնը տոնախմբելով, ևս մեկ անգամ մենք վերհաստատում ենք այս հաղթանակը և վերհաստատելով ասում ենք՝ Եկեղեցին անհաղթահարելի է՝ մեր Տեր Հիսուս Քրիստոսով:

Եվ բոլոր հալածանքները, որ պիտի գան, որ շատերի համար գայթակղություն պիտի լինեն, շատերը պիտի ամուր լինեն, շատերը պիտի իրենց կյանքը տան, դրանք բոլորը այս ժամանակի մեջ են, բայց հավիտենականության մեջ և տիեզերականության մեջ դրանք բոլորը անցողիկ են, և Տիրոջ հաղթանակը մնայուն է: Մնայուն է այն նահատակներով, այն նվիրյալներով, որոնք դարեր շարունակ Քրիստոսի Ճշմարտության համար պատրաստ են եղել իրենց կյանքը տալ, բայց չհրաժարվել դրանից: Այսօր էլ Հայ Եկեղեցին իր հալածանքի շրջանն է անցնում և այդ հալածանքի շրջանը անցնելով՝ գիտենք, որ ունենք չորս ձերբակալված եպիսկոպոսներ, մեկ տնային կալանքի մեջ գտնվող քահանա և անօրինաբար բազում ձերբակալվածներ:

Այս իրողությունը գալիս է ևս մեկ անգամ վերահաստատելու, որ չարը երբեք իր նպատակներից չի հրաժարվում, բայց դրանից վախենալ պետք չէ: Շատերն ասում են՝ հոգևորականը պիտի միայն Աստծո խոսքը քարոզի, չպիտի մտնի տարբեր ոլորտների մեջ, եթե այսպես են ասում՝ քրիստոնեությունից բան չեն հասկանում, Աստվածաշունչը չեն կարդացել, որովհետև Եղիա մարգարեն Աստծո խոսքը խոսելով՝ արքային ասում է, որ սխալ ընթացքի մեջ ես, Նաթան մարգարեն ասում է նույնը, Հովհաննես Մկրտիչն է ասում, մեր Տեր Հիսուս Քրիստոսն է ասում: Աստվածային Ճշմարտությունը տեղ-տեղ լռելու մեջ չէ, Աստվածային Ճշմարտությունը միշտ այդ Ճշմարտությունը ասելու մեջ է: Այդ լռությունը պատեհապաշտության կարող է վերածել, իսկ հոգևորականը, ով Եզեկիել մարգարեի բերանով դետ է կարգված, տեսուչ է կարգված՝ իր հոտին զգուշացնելու վտանգների մասին, սխալների մասին, սխալ ընթացքի մասին, լինի ամենաբարձրը, թե ռամիկը, իրավունք չունի լռելու, Ճշմարտությունը ասելը հոգևորականի առաքելությունն է», -իր խոսքում նշեց Տեր Հայրը:

Հավատավոր ժողովրդին հնարավորություն ընձեռվեց երկրպագելու ու համբուրելու Մայր Աթոռ Սուրբ Էջմիածնից բերված Սուրբ մասունքը: