Ասում են՝ բենզինի համար Եռաբլուրը մոռացաք, ոչ, դա այդպես չէ. Նիկոլ Փաշինյան

Ես ուզում եմ բոլորիս շնորհավորել այս հանգրվանի առիթով: Երեկ տեսա, որ ասում են՝ բենզինի համար Եռաբլուրը մոռացաք, էս մոռացաք, էն մոռացաք, ոչ, այդպես չի: Զարգացած, կայուն, անվտանգ, միջազգային բարձր հեղինակություն ունեցող ՀՀ-ն ամենամեծ հարգանքի տուրքն է մեր նահատակներին: Մեր եղբայրները ընկել են, որպեսզի ՀՀ-ն ոտքի կանգնի, և Հայաստանի Հանրապետությունը ոտքի է կանգնել՝ որպես միջազգային գերտերությունների արժանապատիվ գործընկեր: Այս մասին ասել է  Նիկոլ Փաշինյանը՝ «Հայաստանը և խաղաղությունը ռիսկերի խաչմերուկում» խորագրով քննարկման ժամանակ:

«Մենք առաջ ենք ընթանում շատ ավելի մեծ տեմպերով, քան ի սկզբանե կարող էինք ենթադրել: Երբ մենք Վաշինգտոնի հռչակագրում արձանագրում էինք տարածաշրջանի կապուղիների բացումը Հայաստանի Հանրապետության համար, այդ թվում Ադրբեջանի հիմնական մասի և Նախիջևանի ինքնավար հանրապետության միջև կապի ապահովումը ՀՀ-ի համար փոխադարձ առավելություններով, մենք ենթադրում էինք, որ Հայաստանը պիտի երկաթուղային կապ ստանա աշխարհի հետ: Դա տեղի ունեցավ շատ ավելի վաղ, քան Հայաստանն ու միջազգային հանրությունը սպասում էին: Այսօր Հայաստան-Ադրբեջան երկկողմ առևտրի դրսևորումները տեղի ունեցան շատ ավելի վաղ, քան Հայաստանի և միջազգային հանրությունը սպասում էին, գուցե նաև Ադրբեջանը»,- նշել է նա: