«Վայելե՛ք Նարեկ Սամսոնյանի 11 օր չկերած ուտելիքը». ակցիա՝ ՄԻՊ-ի դիմաց

ՄԻՊ գրասենյակի մոտ Նարեկ Սամսոնյանի առողջական վիճակով պայմանավորված ակցիայի մասնակցիները սնունդ էին բերել իրենց հետ՝ դրանք շարելով գրասենյակի աստիճաններին։

Ակցիայի մասնակիցները ՄԻՊ-ին հիշեցրեցին, որ ՀՀ-ում կա քաղաքական բանտարկյալ՝ ի դեմս Նարեկ Սամսոնյանի, ով այս պահին գտնվում է անժամկետ հացադուլի մեջ, իսկ այս կառույցը, որի պարտականությունն է պաշտպանել քաղաքացիների իրավունքները, դեռևս որևէ հայտարարություն չի արել 11 օր հացադուլի մեջ գտնվող Նարեկ Սամսոնյանի իրավունքների մասին, և այդ գրասենյակից որևէ մեկը չի այցելել նրան։ 

Երեկ հացադուլի մեջ գտնվող Նարեկ Սամսոնյանի վիճակը կտրուկ վատացել է, բայց բուժօգնությունը բավական ուշ է հասել ՔԿՀ։ Բուժօգնության նման սպասարկման մեղավորությունը նաև ՄԻՊ-ինն է. ՄԻՊ գրասենյակի դիմաց ակցիայի ժամանակ հայտարարեց AntiFake.am-ի խմբագիր, փաստաբան Աստղիկ Մաթևոսյանը՝ հիշեցնելով, որ ՄԻՊ-ը 11 օր շարունակ լռում է։

Նշենք, որ ակցիայի կազմակերպիչները 11 օրվա սնունդ էին բերել և շարել ՄԻՊ գրասենյակի աստիճաններին։ Ոստիկանների ուղեկցությամբ ՄԻՊ աշխատակիցը հավաքեց սնունդը։

Աստղիկ Մաթևոսյանը նշեց, որ գրասենյակում ժամը 12-ին ընդմիջման ժամ է, կարող են տանել և վայելել։

«Վայելե՛ք Նարեկ Սամսոնյանի 11 օր չկերած ուտելիքը »,-ասաց Մաթևոսյանը։