Գլխավոր դատախազը հովանավորում է Ալեն Սիմոնյանին. փաստաթուղթ. «Ժողովուրդ»
«Ժողովուրդ» օրաթերթը գրում է.
«ՀՀ գլխավոր դատախազ Աննա Վարդապետյանը, ում հասցեին (այդ թվում մեր լրագրողների մոտ) ՔՊ-ականները բավականին սուր քննադատությամբ են արտահայտվում, այնուամենայնիվ, շարունակում է հովանավորել ԱԺ նախագահ Ալեն Սիմոնյանին։
Ինչպե՞ս, փաստարկենք։
Այս տարվա հունվարի 8-ին «Ժողովուրդ» օրաթերթը ուղարկել էր հարցում ՀՀ գլխավոր դատախազին՝ հայտնելով, որ հանրային տիրույթում շրջանառվել են ՔՊ պատգամավոր Հայկ Սարգսյանի հրապարակային ելույթներ/հայտարարություններ, որոնցում նա բարձրաձայնում է ԱԺ նախագահ Ալեն Սիմոնյանի՝ բուքմեյքերական կազմակերպությունների հետ հնարավոր կապի, կախվածության/շահույթի մասին պնդումներ։
ՀՀ գլխավոր դատախազից հետաքրքրվել էինք՝ արդյոք դատախազությունում գրանցվել են այս մեղադրանքները ԶԼՄ հրապարակումների հիմքով՝ կապված ԱԺ նախագահ Ալեն Սիմոնյանի՝ բուքմեյքերական ոլորտի հետ հնարավոր առնչության վերաբերյալ։ Եթե այո՝
• գրանցման ամսաթիվը,
• դիմումի/հաղորդման բնույթը,
• ի՞նչ ընթացք է տրվել (առանց նախաքննության գաղտնիք կազմող տվյալների)։
ՀՀ դատախազությունը նախաձեռնե՞լ է ստուգողական գործողություններ/նախապատրաստական ուսումնասիրություն կամ դիմե՞լ է իրավասու մարմիններին՝ ստանալու պարզաբանումներ Հայկ Սարգսյանի հայտարարությունների փաստական հիմքերի վերաբերյալ։ Եթե այո՝ ո՞ր մարմիններին և ե՞րբ։
Սկսվե՞լ է որևէ քրեական վարույթ (կամ նյութեր ուղարկվե՞լ են քննչական/հակակոռուպցիոն մարմին) նշված հայտարարությունների կամ դրանցում մատնանշված հանգամանքների հիմքով։ Եթե այո՝ խնդրում ենք նշել՝
• վարույթի մեկնարկի ամսաթիվը,
• իրավական որակման ընդհանուր բնույթը (օրինակ՝ հնարավոր կոռուպցիոն/շահերի բախում/պաշտոնեական լիազորությունների չարաշահում և այլն՝ առանց մանրամասների),
• որ մարմինն է իրականացնում քննությունը։
Եթե ՀՀ դատախազությունը որևէ գործընթաց չի նախաձեռնել, խնդրում ենք հայտնել՝
• ինչ իրավական/փաստական հիմքերով է գնահատվել, որ հանրային հայտարարությունները չեն բավարարում իրավական ընթացք տալու նվազագույն շեմը (հաղորդում հանցագործության մասին, բավարար տվյալներ և այլն)։
ՀՀ դատախազությունը դիմե՞լ է արդյոք Կոռուպցիայի կանխարգելման հանձնաժողովին կամ այլ լիազոր մարմինների՝ շահերի բախման/գույքային հայտարարագրման կամ հնարավոր ազդեցության թեմայով տեղեկատվություն ստանալու/փոխանակելու նպատակով։ Եթե այո՝ ե՞րբ և ի՞նչ շրջանակում։
Կից հղումներ ևս ներկայացրել ենք։ Սակայն ով զարմանք, ինչ է պատասխանել ՀՀ գլխավոր դատախազ Աննա Վարդապետյանը՝ իր հանրային կապերի բաժնի պետի շուրթերով.
«Դատախազությունում քրեական վարույթի առկայության մասին տվյալներ չկան»։
Ինչպես տեսաք՝ մեր գրության մեջ մենք քրեական վարույթի մասին տվյալներ չէինք ուզել։ Ընդհակառակը, հետաքրքրվել էինք՝ կա՞ վարույթ, թե ոչ, եթե չկա՝ ինչու չեք նախաձեռնել, ստուգողական ինչ գործողություններ եք արել և այլն։
Այսպիսով, Աննա Վարդապետյանը հովանավորում է Ալեն Սիմոնյանին՝ իր բուքմեյքերական կազմակերպությունների հետ ունեցած ենթադրյալ շահերի բախումով»։
Մանրամասները՝ «Ժողովուրդ» օրաթերթի այսօրվա համարում:
