Նախընտրական կրքեր Սյունիքում․ Աննա Հակոբյանի «պրոտեժեին» ՔՊ-ից հեռացրել են. «Հրապարակ»

 «Հրապարակ»-ը գրում է.

«Քաղաքացիական պայմանագիր» կուսակցության վարչության երեկվա նիստում իշխանականները Սյունիքի մարզի Մեղրի համայնքի ՔՊ կառույցի տարածքային խորհրդի նախագահի պաշտոնում հաստատել են համայնքի ղեկավար, Սամվել Բաբայանի նախկին թիմակից, ներկայում ՔՊ-ական դարձած Խաչատուր Անդրեասյանի թեկնածությունը։ Միաժամանակ Անդրեասյանին նշանակել են ՔՊ-ի Մեղրիի նախընտրական շտաբի պետ՝ հունիսի ընտրությունների համար։ Ինչպե՞ս է Սամվել Բաբայանի երբեմնի հավատարիմ զինվորը կրկին ՔՊ-ի վստահությանն արժանացել, քանի որ ամիսներ առաջ տեղի կուսակցականները նրան պատժել էին՝ չընտրելով, պարզեցինք կուսակցության մեր աղբյուրներից։

Դեռեւս ամիսներ առաջ գրել էինք, որ օգոստոսի 3-ին տեղի են ունեցել Մեղրիի ՔՊ տարածքային կառույցի ընտրությունները, որոնք անակնկալ արդյունքներ են գրանցել գործող համայնքապետ, դավանափոխ եղած Խաչատուր Անդրեասյանի համար։ Սամվել Բաբայանի կուսակցության քվոտայով համայնքապետ դարձած Անդրեասյանը, որը ճամբարափոխ էր եղել՝ դարձել ՔՊ-ական, իր թեկնածությունն էր առաջադրել ՔՊ տարածքային խորհրդի նախագահի պաշտոնում, որպեսզի շարունակի կարիերան համայնքապետի պաշտոնում, սակայն ՔՊ-ից լավ դաս էր ստացել։ Նա, ճիշտ է՝ ընտրվել էր ՔՊ խորհրդի անդամ, սակայն նրան նախագահ չէին ընտրել` 7 ընտրողից 6-ը նրան կողմ չէր քվեարկել, փոխարենն անցել էր Աննա Հակոբյանի մտերիմը՝ Անդրանիկ Հովհաննիսյանը, որը Փաշինյանի կնոջ հայտարարած «Հաջողակից՝ սկսնակին» ծրագրի շրջանակներում դրամական աջակցություն է ստացել` բիզնես պրոյեկտ իրականացնելու համար, եւ Մեղրիում էլ նրան ընկալում են իբրեւ Աննա Հակոբյանի մերձավոր։ Սակայն պարզվում է՝ այս ամիսներին շատ ջրեր են հոսել, վարչությունը մերժել է Անդրանիկ Հովհաննիսյանի նախագահությունը, ու հայտարարվել են նոր ընտրություններ։

Պատմում են, որ մի կողմից՝ Անդրանիկ Հովհաննիսյանն է «հաբռգել»՝ փորձելով դառնալ տեղի կուսակցականների «ասիչը», մյուս կողմից՝ Խաչատուր Անդրեասյանը չի մարսել իր պարտությունը եւ համարել է, որ իր ապագայի, կարիերայի վրա խաչ է քաշվել. գալիք ընտրություններից հետո, եթե ՔՊ-ն մնաց իշխանության, իրեն գծերից գցելու են, ու տակից սկսել է դավեր նյութել Հովհաննիսյանի դեմ։ Ի վերջո, ներկուսակցական կրքերն այնքան են լարվել, որ ծեծկռտուք է տեղի ունեցել, գլխավոր մեղավոր է հռչակվել Անդրանիկ Հովհաննիսյանը, ինչի պատճառով էլ ՔՊ-ն հեռացրել է նրան կուսակցության շարքերից ու նոր ընտրություններ է նշանակել, որի արդյունքում Բաբայանի երբեմնի թիմակցի բախտը կրկին բացվել է՝ նա է ընտրվել։

Երեկ մենք կցկտուր խոսակցություն ունեցանք Խաչատուր Անդրեասյանի հետ։ Նա ասաց, որ միջոցառման է, չի կարող երկար զրուցել, սակայն չհերքեց, որ Անդրանիկ Հովհաննիսյանին հեռացրել են կուսակցությունից, քանի որ կռվել է թիմակիցների հետ։ Խոստովանեց նաեւ, որ ինքն այժմ ոչ միայն ՔՊ Մեղրու տարածքային խորհրդի ղեկավարն է, այլեւ՝ ՔՊ-ի շտաբի պետը։ Ի դեպ, ՔՊ հնաբնակները կարծում են, որ Անդրեասյանը չի ձգի ընտրություններին, նրա խոսքը համայնքում այնքան էլ չի անցնում։