Երևանի կոնյակի գործարանը ապահովվում է Գեղամ Գևորգյանի առողջապահական ապահովագրությունը

«Ժողովուրդ» օրաթերթը գրում է. «Մրցակցության և սպառողների շահերի պաշտպանության հանձնաժողովի նախագահ Գեղամ Գևորգյանը, ասուլիսի ժամանակ խոսելով առողջապահության համապարփակ ապահովագրության մասին, նշեց, որ իր ապահովագրությունն անում է կնոջ ընկերությունը, որը, «եթե չի սխալվում, 1000 դրամ է»։

Իսկ ո՞վ է Գևորգյանի կինը, և ո՞ր ընկերությունն է հոգում Գեղամ Գևորգյանի առողջապահության ծախսը։

Գեղամ Գևորգյանի կինը՝ Հռիփսիմե Մուշեղյանը, ըստ 2024 թվականի տարեկան հայտարարագրի, 35 մլն 604 հազար դրամ տարեկան եկամուտ է ստացել։ Եկամուտներից 32 մլն 433 հազար դրամը աշխատանքի վարձատրություն է «Երևանի կոնյակի գործարան» ՓԲԸ-ից, որտեղ վերջինս իրավաբանական և կորպորատիվ հարցերի գծով ղեկավարն է։

1 մլն դրամը «Բրենդի Բրիջ» ընկերությունից է՝ կրկին աշխատանքի վարձատրություն։

Հարկ է նշել, որ «Արարատ» կոնյակի-գինու-օղու կոմբինատը «Երևանի կոնյակի գործարան» ՓԲ ընկերության հետ ստեղծել է «Բրենդի Բրիջ» փակ բաժնետիրական ընկերությունը՝ հավասար բաժնեմասերով (50%–50%)։ «Բրենդի Բրիջ» ՓԲԸ-ին է փոխանցվել «Արարատ» անվանումներով (անգլերեն և ռուսերեն) ապրանքային նշանները։

Եկամուտներից 1 մլն 486 հազար դրամը Մուշեղյանը ստացել է ՀՀ Ֆինանսների նախարարությունից, 84 հազար դրամը ապահովագրական հատուցում է, իսկ 598 հազար դրամը՝ այլ եկամուտ՝ «Ամերիաբանկ» ՓԲԸ-ից։

Գևորգյանի կինը նաև 2022 թ.-ին Pernod Ricard-ից նվիրատվություն է ստացել պարտատոմսեր՝ 25 հազար 86 եվրո արժեքով։ Թե ինչ առիթով է Մրցակցության պաշտպանության հանձնաժողովի նախագահի կինը մասնավոր ընկերությունից նման նվիրատվություն ստացել, հայտարարագրում չի նշվում։ Սակայն հարկ է նշել, որ Pernod Ricard ընկերությունը խմիչքներ ներմուծող խոշոր ընկերություն է։

Ստացվում է, որ Մրցակցության և սպառողների շահերի պաշտպանության հանձնաժողովի նախագահ Գեղամ Գևորգյանի առողջապահական ապահովագրությունը ապահովվում է «Երևանի կոնյակի գործարան» ՓԲԸ-ի կողմից։

Արդյոք Մրցակցության և սպառողների շահերի պաշտպանության հանձնաժողովի նախագահը այստեղ խնդիր չի տեսնում՝ հարցական է»։

Մանրամասները՝ «Ժողովուրդ» օրաթերթի այսօրվա համարում: