Էլ ի՞նչ միջոցների է դիմելու Փաշինյանը Եպիսկոպոսաց ժողովը խափանելու համար. «Փաստ»

Որևէ մեկի համար գաղտնիք չէ, որ Նիկոլ Փաշինյանը նպատակ ունի խափանել Եպիսկոպոսաց ժողովը՝ լինի դա Հայաստանում, թե Ավստրիայում, ինչպես ավելի վաղ հայտնել էր Մայր Աթոռը։ Հիշեցնենք, Հայաստանում մեկ անգամ Եպիսկոպոսաց ժողովը խափանվել էր գործող իշխանությունների քաղաքական բռնաճնշումների հետևանքով։ Դրանից հետո Մայր Աթոռը հայտարարեց, որ Եպիսկոպոսաց ժողովն Ամենայն հայոց կաթողիկոսի հրավերով տեղի կունենա Ավստրիայի Սանկտ Փյոլթըն քաղաքում փետրվարի 16-ից 19-ը։ Ժողովը խափանելու կամ գոնե այն Հայաստանում անցկացնելու համար Փաշինյանի հանձնարարությամբ ընդհուպ քրեական վարույթ է հարուցվել վեց եպիսկոպոսների և մեկ քահանայի նկատմամբ, բոլորի համար բացակայելու արգելք կիրառվել, որպեսզի թույլ չտրվի նրանց մասնակցությունը։

Ներկայում Մայր Աթոռում դեռևս շարունակվում են քննարկումները՝ արդյոք ամեն կերպ ժողովը իրականացնել Ավստրիայում, թե, ամեն դեպքում, Հայաստանում։ Ընդ որում, եթե, ի վերջո, որոշվի, որ նույնիսկ այս պայմաններում պետք է ժողովն անցկացնել Ավստրիայում, մեր աղբյուրների փոխանցմամբ, այս սցենարի դեպքում ևս Փաշինյանը նոր սադրանք է մտածել։ Ի մասնավորի, որոշել են Ավստրիա գործուղել Փաշինյանի կողմն անցած տիրադավ եպիսկոպոսներին, որոնք տեղում շոու կկազմակերպեն, սադրանքներ կհրահրեն Ժողովը խափանելու նպատակով։ Ավելի վաղ Փաշինյանին միացած մեկ տասնյակ տիրադավ եպիսկոպոսներից միայն ԱՄՆ Արևմտյան թեմի առաջնորդ Հովհան արքեպիսկոպոս Տերտերյանն էր հայտարարել, որ մասնակցելու է Սանկտ Փյոլթընում կայանալիք Եպիսկոպոսաց ժողովին։ Փաշինյանը մտադիր է ևս երեք եպիսկոպոսի ուղարկել Ավստրիա՝ կարգալույծ հռչակված Արման (Գևորգ) Սարոյանին, Նավասարդ Կճոյանին և Առաքել Քարամյանին, հստակ հանձնարարություններով ու «ինստրուկտաժով», թե ինչպես պետք է նրանք իրենց պահեն Ավստրիայում և ինչեր պիտի անեն Ժողովը խափանելու համար։

Մեր աղբյուրի փոխանցմամբ, նույնիսկ որոշվել է, որ այդ անձանց հետ հատուկ ծառայությունների աշխատակիցների ու քպականների, այդ թվում՝ խմբակցության պատգամավորների են ուղարկելու, որպեսզի տեղում պաշտպանեն իրենց տիրադավներին։

Թերթի տեղեկություններով, օրերս Փաշինյանն ինքը իր մոտ է հավաքել Հայաստանում գտնվող տիրադավ եպիսկոպոսներին և քահանաներին, հանձնարարել ավելի ակտիվ լինել, հարցազրույցներ տալ տարբեր իշխանական լրատվամիջոցների, վարկաբեկել և հեղինակազրկել Ամենայն հայոց կաթողիկոսին։ Իսկ այդ հոգևորականներն էլ իշխանության կոմպրոմատների ճնշման ներքո ստիպված են եղել գլխահակ լսել Փաշինյանին ու կատարել նրա հրահանգները։

Մանրամասները՝ «Փաստ» օրաթերթի այսօրվա համարում