Հայաստանը մտադիր է ՌԴ-ի հետ բարեկամաբար, ընկերաբար, եղբայրաբար քննարկել ՀԿԵ-ի կառավարման հարցը. Փաշինյան
Հայկական երկաթուղու՝ ռուսական կառավարումը ներկա աշխարհաքաղաքական իրավիճակում որոշակիորեն մեզ զրկում է մրցակցային առավելությունից։ Այսօր Հանրային հեռուստաընկերությանը տված հարցազրույցում հայտարարեց Նիկոլ Փաշինյանը։
«Միջազգային լարված համատեքստի պատճառով և այն հանգամանքի բերումով, որ ՀՀ սեփականություն հանդիսացող երկաթուղին գտնվում է «Ռուսական երկաթուղիների» կառավարման ներքո, մենք զգում ենք, որ այստեղ մեր մրցակցային առավելությունը կորցնում ենք։ Մենք պետք է մտածենք, թե ինչ անենք, որովհետև սա 1, 2, 3 կամ 4 տարվա հարց չէ։ Մենք պետք է լուծում գտնենք, և այդ լուծումը պետք է գտնենք բարեկամական, ընկերական, եղբայրական տրամաբանության մեջ»,- ասաց Փաշինյանը։
Ըստ նրա՝ տարբեր տեղեկություններ են պտտվում, ըստ որոնց՝ հայկական երկաթուղին նույնիսկ ներկայացվում է որպես ռուսական ուղի։ Փաշինյանի խոսքով՝ դրա համար էլ զրոյից մի քանի միլիարդ դոլարի ներդրում է արվում Կարս-Դիլիջու երկաթգիծը կառուցելու համար։ Փաշինյանը նշեց, որ հարցն ուղիղ քննարկել է Թուրքիայի նախագահ Ռեջեփ Թայիփ Էրդողանի, ինչպես նաև՝ Ադրբեջանի նախագահ Իլհամ Ալիևի հետ։
«Ասել եմ՝ ինչու՞ եք մի քանի միլիարդ ծախսում ստեղծելու մի բան, որն արդեն իսկ գոյություն ունի, իհարկե, այդ հարցին դիվանագիտական լռությամբ են պատասխանել, բայց հիմա միջազգային մամուլի արձագանքը տեսնելով մենք հասկանում ենք, որ հիմնական խնդիրը սա է, և մենք պետք է հասկանանք՝ ինչ լուծումներ ունենք»,- ասաց Փաշինյանը։
Հավելեց՝ խոսքը Հայաստանի ռազմավարական երկարատև շահերի մասին է, և մեր բոլոր բարեկամ երկրները պետք է շահագրգռված լինեն, որ Հայաստանի շահերը սպասարկվեն, ոչ թե հայտնվեն փակուղու մեջ։
Հայաստանի երկաթուղային ենթակառուցվածքը ՀԿԵ-ին կոնցեսիոն կառավարման է հանձնվել 2008 թվականի փետրվարին՝ 30 տարի ժամկետով և ևս 10 տարով երկարաձգելու իրավունքով։
