Մեր հոգևոր կյանքը չենք կարող ապրել դիմակ դնելով. Մեծ Պահքի շրջանը երկարատև լիցքավորման շրջան է, այսօրվանից մեզ դնում ենք հոգևոր լիցքավորման. Հայր Ռուբեն

Այսօր Վերին Արտաշատի Սուրբ Աստվածածին եկեղեցում մատուցվել է Բուն Բարեկենդանի Սուրբ Պատարագ՝ ձեռամբ Տեր Հովակիմ քահանա Հովակիմյանի։

Տոնի պատգամը հավատացյալներին փոխանցել է Մասյացոտնի թեմի առաջնորդական տեղապահ Հոգեշնորհ Տեր Ռուբեն վարդապետ Զարգարյանը։

Հայր Սուրբն իր քարոզում նշել է՝ Պահոց շրջանը մեզ կրթում է, մեզ համար դպրոց է, դպրոց է, նախևառաջ, արդարության դաստիարակության, ճշմարտության ընկալման, հոգևոր ուժերի կուտակման, չափավորության մեխանիզմի ձևավորման ու կյանքի արժևորման։

«Մենք մեր հոգևոր կյանքը չենք կարող ապրել դիմակ դնելով՝ դերասանի պես, կեղծավորի պես։ Այո՛, մարդ ենք, վախեր ունենք, շատ  հաճախ թաքցնում ենք որոշ բաներ, որովհետև անվան հարց կա, պատվի խնդիր կա, մեր հասարակությունն էլ, որպես կանոն, բարությամբ չի փայլում, շատ ենք բամբասում, փոխանակ մեկս մյուսին օգնենք, բայց, այսքանով հանդերձ, հոգևոր այս ճամփորդությունը գալիս է մեզ այս դաշտում կրթելու, որ  պետք է լինել անկեղծ, չունենալ ներքին պառակտվածություն»,- ընդգծել է Հայր Ռուբենը։

Հայր Սուրբը նշել է, որ պահեցողությունը նման է կուտակիչի, նպատակ չէ Պահք պահելու։

«Մենք Պահք ենք պահում, որ մեր հոգևոր ուժերը կուտակենք, այսօրվա լեզվով ասած, ակումլյատորին, որը դնում ենք լիցքավորման։ Մեծ Պահքի այս շրջանը երկարատև լիցքավորման շրջան է, հետևապես, մենք այսօրվանից մեզ դնում ենք հոգևոր լիցքավորման»,- հավելել է Հայր Սուրբը։