Ռուբեն Վարդանյանի 20 տարվա ազատազրկումը հայ առաջնորդների դեմ դատավարական ծաղր է

Արցախի նախկին պետնախարար, հայտնի բարերար Ռուբեն Վարդանյանին Բաքվի դատարանի կողմից 20 տարվա ազատազրկման դատապարտելու, ինչպես նաև Ադրբեջանում պահվող օկուպացված  Արցախի Հանրապետության ռազմաքաղաքական ղեկավարության նախկին ներկայացուցիչների դեմ կայացված դատավճիռների վերաբերյալ Amnesty International-ի Արևելյան Եվրոպայի և Կենտրոնական Ասիայի տնօրեն Մարի Ստրութերսը հանդես է եկել հայտարարությամբ։

«16 մեղադրյալների դատապարտումը, որի կուլմինացիան Ռուբեն Վարդանյանի դեմ այս դատավճիռն էր, ուղղակի ծաղրերգություն է։ Այն փաստը, որ Ռուբեն Վարդանյանը և մյուսները՝ իր պես քաղաքացիական մի քանի անձինք, դատվել են ռազմական դատարանում, ինքնին լուրջ մտահոգություններ է առաջացնում և անհամատեղելի է արդար դատավարության երաշխիքների հետ։

Մինչ Լեռնային Ղարաբաղի՝ տասնամյակներ տևած հակամարտության հետևանքով զոհերը և Հայաստանում, և Ադրբեջանում արժանի են ճշմարտության, արդարադատության, փոխհատուցման և չկրկնվելու երաշխիքների, այս դատավճիռները վիրավորանք են միջազգային իրավունքի համաձայն հանցագործությունների բոլոր զոհերի համար»։

Մարի Ստրութերսն ընդգծել է, որ բազմաթիվ չափազանց լուրջ հանցագործությունների մեջ մեղադրվող Ռուբեն Վարդանյանը և մյուս մեղադրյալները դատվել են գործնականում փակ լսումներով, որոնք հիմնված են եղել նրանց համար անհասկանալի լեզվով գրված «ապացույցների» վրա, դրան բավարար չափով չեն թարգմանվել։

«Նույնիսկ միայն Վարդանյանի դեմ առաջադրված ավելի քան 40 մեղադրանքները, այդ թվում՝ «ահաբեկչություն» և «մարդկության դեմ հանցագործություններ», դատավարության ընթացքում ամբողջությամբ հրապարակայնորեն չեն բացահայտվել։ Amnesty International-ը Ադրբեջանի իշխանություններից տեղեկատվություն է խնդրել դատավարության և ապացույցների մասին, բայց պատասխան չի ստացել։

Ադրբեջանը պետք է կատարի իր պարտավորությունները մարդու միջազգային իրավունքների շրջանակներում և ապահովի, որ հանցագործությունների մեջ մեղադրվող բոլոր անձինք դատվեն միջազգային իրավունքի և արդար դատավարության չափանիշների համապատասխան»։