Իրավական «բեսպրեդելը» և քրեական ենթամշակույթի դեմ ձախողված պայքար. ստանձնեք քաղաքական պատասխանատվություն՝ հրաժարական տվեք

 

Հեղափոխական Հայաստանի ողբերգությունն այն է, որ իրավապահ համակարգի պատասխանատու պաշտոնյաներից ոչ ոք չի ստանձնում քաղաքական պատասխանատվություն և չի ներկայացնում հրաժարական, ինչը խորացնում է հանրության անվստահությունը և նպաստում իրավապահ համակարգի արդյունավետության անկմանը։

 

Քրեական ենթամշակույթի դեմ պայքարի ձախողումը արտահայտվել է այն փաստով, որ իրավապահները՝ առանց որևէ այլընտրանքային գործիքներ ներդնելու, կազմաքանդել են հանցագործությունների կանխարգելման և պրոֆիլակտիկայի ինստիտուտը, որը տարիներ շարունակ հանդիսացել է օպերատիվ-հետախուզական գործունեության առանցքային բաղադրիչ։

 

Ընդ որում, քրեական ենթամշակույթի կանոններով՝ նմանօրինակ միջադեպերը, ըստ ամենայնի, կհամարվեին «բեսպրեդել», և քրիմինալի հետ առնչվող անձանց մտքով անգամ չէր անցնի օրը ցերեկով, բնակելի թաղամասում փոխհրաձգություն կազմակերպել՝ հետագայում «սպրոս»֊ից խուսափելու համար։

 

Իրավապահ մարմինների բուն առաքելությունից շեղվելը արտահայտվում է նաև իրենց մասնակցությամբ Հայ Առաքելական եկեղեցու նկատմամբ իրականացվող հետապնդումներում, ինչպես նաև ընդդիմադիր գործիչների նկատմամբ կիրառվող անհամաչափ և ցուցադրական ուժի մեջ։ Բացի այդ, արձանագրվում են դեպքեր, երբ քաղաքացիների կողմից ներկայացված ահազանգերը՝ հանցագործությունների վերաբերյալ, մերժվում են՝ հանցագործության մասին հաղորդում ընդունելուց, ինչը հովանավորվում է համապատասխան գերատեսչությունների ղեկավարության կողմից։

 

ՀՀ պահեստազոր զինծառայողների նախաձեռնությունը հստակորեն դատապարտում է իրավապահ համակարգի ղեկավարության անմիտ և սխալ գործողությունները և պահանջում է, որ նրանք ստանձնեն քաղաքական պատասխանատվություն՝ ներկայացնելով հրաժարական՝ հետագայում անմեղ զոհերից խուսափելու համար»։