Այնտեղ, որտեղ ազգերը առաջնորդվում են ոչ թե ստամոքսային, այլ գաղափարական առաջնահերթություններով, հաջողությունն ու հաղթանակը երաշխավորված են. Տիգրան Աբրահամյան

ԱԺ պատգամավոր Տիգրան Աբրահամյանը գրել է.

«Սրանից 38 տարի առաջ՝ 1988 թվականի փետրվարի 20-ին, Լեռնային Ղարաբաղի մարզխորհրդի արտահերթ նստաշրջանն ընդունեց որոշում, որով արտահայտեց արցախցիների ազատ ինքնորոշվելու կամքը։

Լեռնային Ղարաբաղի ինքնավար մարզի ժողովրդական պատգամավորների խորհրդի արտահերթ նստաշրջանում, հիմնվելով արցախահայության սկզբունքային դիրքորոշման վրա, որոշում կայացվեց՝ միջնորդել Ադրբեջանական ԽՍՀ և Հայկական ԽՍՀ Գերագույն խորհուրդներին՝ մարզը Ադրբեջանի կազմից Հայաստանի կազմ փոխանցելու համար։

Վերածննդի այդ ժամանակներում հայ ժողովրդի արտահայտած վճռականությունն ու հաստատակամությունը մեզ հնարավորություն տվեցին քաղաքական գործընթացների ընթացքը բեկել՝ պատմական արդարությունը վերականգնելու և մեր ժողովրդի խախտված ու արհամարհված իրավունքները պաշտպանելու համար։

Իրադարձությունները ցույց են տվել, որ այնտեղ, որտեղ ազգերը առաջնորդվում են ոչ թե ստամոքսային, այլ գաղափարական առաջնահերթություններով, հաջողությունն ու հաղթանակը երաշխավորված են։

Հայը տարբեր փուլերում իր խելամիտ և ռացիոնալ որոշումը կայացրել է, և մեր հավաքական ճակատագրի հարցը կրկին կախված է մեր սկզբունքային դիրքորոշումներից։

Փառք գաղափարի մարտիկներին, հավերժ փառք գաղափարի համար ընկածներին»։