ՀՀ ՆԳՆ հանձնարարել է բողոքիս լուծում տալ այն պաշտոնատար անձին, որի գործողությունների դեմ բողոք եմ ներկայացրել նախարարին․ Արտակ Սարգսյանի փաստաբանը փաստաթղթեր է ներկայացրել և մանրամասներ հայտնել

«Քոչարի ազգային վերածնունդ և ազգի զարթոնք» կուսակցության նախագահ Արտակ Սարգսյանի փաստաբան Արա Զաքարյանը NEWSPRESS.am-ին է տրամադրել փաստաթղթեր, որոնց մեջ ներկայացված են մանրամասներ՝ Արտակ Սարգսյանի նկատմամբ կիրառված խափանման միջոցի և գործի ընթացքի մասին։

1. Երևան քաղաքի առաջին ատյանի ընդհանուր իրավասության քրեական դատարանի 24.10.2025 թ-նի որոշմամբ Արտակ Սարգսյանի նկատմամբ որպես խափանման միջոց համակցված կիրառվել է վարչական հսկողություն և բացակայելու արգելք։

2. ՀՀ վերաքննիչ քրեական դատարանի 08.12.2026 թ-նի որոշմամբ Առաջին ատյանի դատարանի որոշումը բեկանվել է և Արտակ Սարգսյանի նկատմամբ կիրառված բոլոր խափանման միջոցները վերացվել՝ Արտակ Սարգսյանի կողմից իրեն մեղսագրված հանցանքները կատարելու հիմնավոր կասկածի բացակայության հիմքով։ Օրենքի համաձայն՝ ՀՀ Վերաքննիչ դատարանի որոշումն օրինական ուժի մեջ է մտել հրապարակման պահից և ենթակա կատարման բոլորի համար։

3. Ստանալով ՀՀ վերաքննիչ քրեական դատարանի որոշման օրինակը ստանալուն պես, դիմել ենք ՀՀ ԱՆ պրոբացիայի ծառայությանը՝ խնդրելով Արտակ Սարգսյանի ձեռքից հանել նրա տեղաշարժի հսկողությունն իրականացնող էլեկտրոնային սարքը, ինչպես նաև ՀՀ ոստիկանություն՝ խնդրելով դադարեցնել Արտակ Սարգսյանի սահմանային սահմանափակումը։ Միաժամանակ դիմումներին կից ներկայացրել ենք ՀՀ վերաքննիչ քրեական դատարանի որոշման բնօրինակը։

Սահմանային տեղաշարժի սահմանափակումն իրականացվում է ՍԷԿՏ կոչվող ծրագրում անձի տվյալները տեղադրելով։

4. ՀՀ ԱՆ պրոբացիայի ծառայությունն անմիջապես Արտակ Սարգսյանի ձեռքից հանել է էլեկտրոնային սարքը։

5. 29.12.2025 թ-ին զանգահարել եմ ՀՀ ոստիկանություն տեղեկանալու թե դադարեցվել է արդյոք պաշտպանյալիս սահմանային տեղաշարժի սահմանափակումը։ Ի պատասխան իրավասու անձը հայտնեց, որ ՍԷԿՏ-ը բացելու համար միակ հիմքը դա քննիչի գրությունն է, իրենք քննիչի հետ խոսել են, վերջինս դրան կտրականապես դեմ է, ուստի Արտակ Սարգսյանի նկատմամբ իրականացվող սահմանային տեղաշարժի հսկողությունը չի դադարեցվելու։

6. ՀՀ ոստիկանության աշխատակցի հետ տեղի ունեցած հեռախոսազրույցից հետո՝ 29.12.2025 թին էլեկտրոնային եղանակով միջնորդություն եմ ներկայացրել քննիչ Գոռ Դավթյանին, խնդրելով անհապաղ գրություն ուղարկել ՀՀ ոստիկանություն՝ Արտակ Սարգսյանի ՍԷԿՏ-ը բացելու համար։

7. 07.01.2026 թ-ին ստացել եմ ՀՀ ՆԳՆ ոստիկանության քրեական ոստիկանության գլխավոր վարչության հետախուզության ծայրահեղականության և թրաֆիքինգի դեմ պայքարի վարչության պետ Ռ.Պողոսյանի 29.12.2025 թ-ով թվագրված գրությունն այն մասին, որ ՀՀ ՔԿ ԵՔՔՎ ծանր հանցագործությունների քննության քննչական բաժնից Արտակ Գորդերզինի Սարգսյան, ծնված 07.07.1971 թ-ին կենսագրական տվյալներով անձի նկատմամբ թիվ 59104124 քրեական վարույթով 
ընտրված խափանման միջոցի մասին տվյալները ՀՀ ՆԳՆ ոստիկանության քրեական ոստիկանության գլխավոր վարչության կողմից զետեղվել են ՍԷԿՏ համակարգի պահոց, ինչի արդյունքում հիշյալ անձի սահմանային տեղաշարժի նկատմամբ սահմանվել է համապատասխան հսկողություն, որը 29.12.2025 թ-նի դրությամբ շարունակում է գործել։

Ուստի, Արտակ Սարգսյանի սահմանային տեղաշարժի նկատմամբ առկա հսկողությունը կարող է դադարեցվել բացառապես նախաձեռնող մարմնից ստացված գրության /որոշման, հանձնարարականի և այլնի/ հիման վրա։

8. 11.01.2026 թ-ին էլեկտրոնային եղանակով հաղորդում եմ ներկայացրել ՀՀ ՆԳՆ ոստիկանության քրեական ոստիկանության գլխավոր վարչության հետախուզության ծայրահեղականության և թրաֆիքինգի դեմ պայքարի վարչության աշխատակիցների կողմից օրինական ուժի մեջ մտած դատական ակտի կատարմանը խոչընդոտելու դեպքի առթիվ վարույթ նախաձեռնել ՀՀ քրեական օրենսգրքի 507 հոդ. /Դատական ակտը չկատարելը կամ դրա կատարմանը խոչընդոտելը/։

9. 11.01.2026 թ-ին էլեկտրոնային եղանակով՝ https://e-request.am  կայքով, գրություն եմ ուղարկել ՀՀ ՆԳՆ նախարարին, տեղեկացնելով, որ օրինական ուժի մեջ մտած դատարանի որոշման պահանջները կատարելուց հրաժարվելով, իր աշխատակիցը հանցանք է կատարում, որից ելնելով, խնդրել եմ հանձնարարել նրան կատարելու ՀՀ վերաքննիչ դատարանի որոշման պահանջները, այն է՝ դադարեցնել Արտակ Սարգսյանի նկատմամբ ապօրինաբար իրականացվող սահմանային տեղաշարժի հսկողությունը։

Ի հավաստում, գրությանը կցել եմ ՀՀ վերաքննիչ քրեական դատարանի որոշման, Արտակ Սարգսյանի ՍԷԿՏ բացելու մասին իմ գրության և ՀՀ ՆԳՆ ոստիկանության քրեական ոստիկանության գլխավոր վարչության հետախուզության ծայրահեղականության և թրաֆիքինգի
դեմ պայքարի վարչության պետ Ռ.Պողոսյանի 29.12.2025 թ-ով թվագրված գրության պատճենները։ 

10. 14.01.2026 թ-ին ստացել եմ քննիչի 05.01.2026 թ-ով թվագրված որոշումը, որով նա հրաժարվել է դիմել ՀՀ ՆԳՆ ոստիկանության քրեական ոստիկանության գլխավոր վարչություն՝ Արտակ Սարգսյանի վերաբերյալ «ՍԷԿՏ» համակարգում առկա սահմանափակումները վերացնելու համար այն պատճառաբանությամբ, որ համաձայն չէ ՀՀ վերաքննիչ քրեական դատարանի կողմից կայացված որոշման հետ և դատախազը պատրաստվում է այդ որոշումը բողոքարկել ՀՀ վճռաբեկ
դատարան։

11. 15.01.2026 թ-ին էլեկտրոնային եղանակով հաղորդում եմ ներկայացրել քննիչ Գոռ Դավթյանի և ոստիկանության աշխատակից Ռ.Պողոսյանի դեմ, խնդրելով վարույթ նախաձեռնել ՀՀ քրեական օրենսգրքի 441 հոդ.2-րդ մասի /պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը/ և նույն օրենսգրքի 507 հոդ. 2-րդ մասի հատկանիշներով։

12. 15.01.2026 թ-ին էլեկտրոնային եղանակով քննիչի 05.01.2026 թ-նի որոշումը բողոքարկել եմ ՀՀ գլխավոր դատախազին և Երևան քաղաքի դատախազին, խնդրելով քննիչի որոշումը ճանաչել ոչ իրավաչափ և անհապաղ ցուցում տալ նրան Արտակ Սարգսյանի վերաբերյալ ՍԷԿՏ համակարգում սահմանափակումները վերացնելու ուղղությամբ։ Մինչ օրս բողոքիս վերաբերյալ որոշում չի կայացվել։

13. 11.02.2026 թ-ին ստացել եմ ՀՀ գլխավոր դատախազության դատախազ Ա.Դանիելյանի կողմից հաստատված՝ ՀՀ հակակոռուպցիոն կոմիտեի քննիչ Ռ.Հակոբյանի 06.02.2026 թ-նի գրությունը, որով վերջիններս հրաժարվել են վարույթ նախաձեռնել այն պատճառաբանությամբ, թե իբրև խափանման միջոցի վերաբերյալ Վերաքննիչ դատարանների որոշումներն օրինական ուժի մեջ են մտնում բողոքարկման ժամկետը լրանալուց հետո, մինչդեռ տվյալ դեպքում սահմանված ժամկետում ՀՀ Վերաքննիչ քրեական դատարանի որոշումը ՀՀ գլխավոր դատախազի կողմից բողոքարկվել է ՀՀ վճռաբեկ դատարան։

14. 11.02.2026 թ-ին ստացել եմ նաև 1-ին հաղորդման հիման վրա վարույթ չհարուցելու մասին ՀՀ ՔԿ Երևան քաղաքի Քանաքեռ-Զեյթուն վարչական շրջանի քննչական բաժնի քննիչ Ա.Տոնոյանի 06.02.2026 թ-նի գրությունը, որը հաստատվել է Երևանի Քանաքեռ-Զեյթուն վարչական շրջանների դատախազության դատախազ Ա.Մկրտչյանի կողմից։ Քննիչն ու դատախազը իրենց դիրքորոշման հիմքում դրել են կրկին դրել են նախորդ կետում բերված փաստարկները։

15. 12.02.2026 թ-ին էլեկտրոնային եղանակով 2 բողոքներ եմ ներկայացրել։ Առաջինը հասցեագրվել է ՀՀ գլխավոր դատախազին, երկրորդը՝ Երևանի Արաբկիր և Քանաքեռ-Զեյթուն վարչական շրջանների դատախազին։ Բողոքներով դատախազներից խնդրել եմ քննիչների գործողությունները ճանաչել ոչ իրավաչափ և ցուցում տալ նրանց վարույթներ նախաձեռնել։

16. 18.02.2026 թ-ին ստացել եմ ՀՀ ՆԳՆ ոստիկանության քրեական ոստիկանության գլխավոր վարչության հետախուզության ծայրահեղականության և թրաֆիքինգի դեմ պայքարի վարչության պետ Ռ.Պողոսյանի 16.02.2026 թ-ով թվագրված գրությունը, որով նա կրկին ինձ տեղեկացնում է, որ ՍԷԿՏ համակարգի պահոցից Արտակ Սարգսյանի տվյալները չեն հանվել։

Այսպիսով, ստացվում է, որ ՀՀ ՆԳՆ հանձնարարել է բողոքիս լուծում տալ այն պաշտոնատար անձին, որի գործողությունների դեմ բողոք եմ ներկայացրել նախարարին։

NEWSPRESS.am-ը նեիկայացնում է նաև Արտակ Սարգսյանի փաստաբան Արա Զաքարյանի կողմից ՆԳ նախարար Արփինե Սարգսյանին ներկայացված բողոքն ու ՀՀ ՆԳՆ ոստիկանության քրեական ոստիկանության գլխավոր վարչության հետախուզության ծայրահեղականության և թրաֆիքինգի դեմ պայքարի վարչության պետ Ռ.Պողոսյանի պատասխանը։