Ադրբեջանը շարունակում է գողանալ, ոչնչացնել և յուրացնել հայկական մշակույթն ու ժառանգությունը․ Knock LA

Լոս Անջելեսում է բնակվում հայկական սփյուռքի ամենաստվար հատվածը՝ ավելի քան 200,000 հայ, գրում է Knock LA-ը:

Ինչպես նշվում է, 2023 թվականին էթնիկ զտումները և Ադրբեջանի ներխուժումն Արցախ հանգեցրին ամբողջ բնակչության արտաքսմանը մի հողից, որը դարեր շարունակ բնակեցված է եղել հայերով: Հարյուրավոր հայ ընտանիքներ լքեցին իրենց տները՝ իրենց հետ վերցնելով միայն այն, ինչ կարող էին տանել:

Երբ Ադրբեջանը հարձակվեց Արցախի վրա, միջազգային հանրության արձագանքը հուսահատեցնող էր: Հայերի տառապանքները դեռևս քիչ ուշադրության են արժանանում:

Էթնիկ զտումների և դրանց հետևանքների լուսաբանումը հազվադեպ էր քննարկվում, սակայն դրանց երկարաժամկետ ֆիզիկական և հոգեբանական հետևանքները բազմաթիվ հայերի կյանքեր են կործանել, այդ թվում՝ Լոս Անջելեսի համայնքի ընտանիքներում:

Արցախի պահպանումը դառնում է ավելի ու ավելի հրատապ, քանի որ Ադրբեջանը շարունակում է առևանգել, ոչնչացնել և յուրացնել հայկական մշակույթն ու ժառանգությունը:

Արցախում իրականացված էթնիկ զտումներից հետո այնտեղ շատ քիչ հայեր էին մնացել՝ մոտ 14–20 հոգի: Նրանց մեծ մասը հիվանդ էր, ուներ հաշմանդամություն և չէր ցանկանում կամ չէր կարող լքել իր տունը ադրբեջանական ներխուժումից հետո: 2026 թվականի հունվարի դրությամբ մնացած 11 հայերը բռնազավթված Արցախից տեղափոխվել են Հայաստան. ադրբեջանցի պաշտոնյաները պնդում են, թե դա տեղի է ունեցել նրանց «գրավոր խնդրանքների» հիման վրա:

Արցախի էթնիկ զտումներից անցել է ավելի քան երկու տարի, սակայն դրանք չեն ջնջել վերադարձի հավերժական հույսը: Արցախը մնում է աշխարհասփյուռ հայության պարտավորությունը: