«Ծնողները ցանկանում էին, որ իրենց զավակը մահանա իբրև քրիստոնյա». Հայր Զաքարիայի հուզիչ պատմությունը մահամերձ 6 օրական երեխայի մկրտության մասին, ով այսօր արդեն չափահաս է (տեսանյութ)

Մայր Աթոռի Քարոզչական կենտրոնի տնօրեն Հոգեշնորհ Տ. Զաքարիա ծայրագույն վարդապետ Բաղումյանը հավատքի վկայություն է ներկայացրել իր կյանքից: 

Հայր Սուրբը, երբ նոր էր ձեռնադրվել, ձմռան ցրտաշունչ մի օր իրեն ասել են, որ պետք է մկրտի 6 օրական երեխայի, որը մահամերձ էր ու 40 աստիճան տաքության մեջ։

«Բժիշկներն այլևս որևէ հույս չէին տալիս, բայց հավատավոր ծնողները ցանկանում էին, որ իրենց զավակը մահանա իբրև քրիստոնյա»,- պատմել է Հայր Զաքարիան։

Հայր Սուրբը, երբ երխային ընկղմել է ավազանի մեջ, ապա հանել, որ հանձնի կնքահորը, այտոսկրը կպցրել է երեխայի այտին ու զգացել, որ տաքություն չունի երեխան։

«Մկրտությունից հետո այդ երեխան շուտով չափահասության կմոտենա, երկու անգամ իրեն տեսել եմ... ես ասացի՝ դա ձեր հավատքի արդյունքն էր, բայց նաև ուրախացա, որ Աստված պահում է այդ օրհնությունը»,- նշել է Հայր Զաքարիան։