Ռուսական ռազմաբազայի ներկայության հետ կապված որևէ ծրագիր չունենք, մտահոգություններ էլ չունենք․ Փաշինյան

«Ներկայումս մեր սահմանների բոլոր անցակետերը վերահսկվում են Հայաստանի սահմանապահների կողմից»,- Պրահայում լեհ քաղաքագետների հետ հանդիպման ժամանակ հայտնեց Նիկոլ Փաշինյանը, հիշեցնելով, որ հետխորհրդային Հայաստանում մշտապես ռուս սահմանապահներ են եղել այնտեղ։

Փաշինյանը այդ հարցում շնորհակալություն հայտնեց ռուսական կողմին, քանի որ նորանկախ Հայաստանը նման կարողություններ չուներ, իսկ հիմա ունի։

Պատասխանելով Ռուսական 102-րդ ռազմաբազայի՝ Հայաստանից դուրս բերման հարցին՝ Փաշինյանն ասաց. «Մենք որևէ պլան, ծրագիր չունենք, մտահոգություններ էլ չունենք կապված ռուսական ռազմաբազայի ներկայության հետ։ Մենք սերտ գործընկերներ ենք Ռուսաստանի հետ և շատ սերտ տնտեսական և քաղաքական կապեր ունենք, թեպետ դուք գիտեք, որ մենք սառեցրել ենք մեր մասնակցությունը ՀԱՊԿ-ին և այն կապվծ է որոշ իրադարձությունների հետ, որոնք տեղի ունեցան 2022 թվականին»։

 Նա բացատրեց, որ Հայաստանը հիասթափված էր ՀԱՊԿ-ից, քանի որ, ունենալով իրավական պարտականություն, ՀԱՊԿ-ը հավուր պատշաճի չարձագանքեց Հայաստանի դեմ ծառացած անվտանգության մարտահրավերներին։

 «Մյուս կողմից մենք ասում ենք, որ Ռուսաստանի հետ մեր հարաբերությունները ներկայումս վերափոխման փուլում են և նոր հարաբերություններ ենք ձևավորում։ Մենք վճռական ենք և կցանկանայինք զարգացնել մեր հարաբերությունները Ռուսաստանի հետ, բայց  միանշանակ է, որ այդ հարաբերությունները փոխվում են բազմաթիվ գործոնների պատճառով»,- ասաց Փաշինյանը՝ հիշեցնելով որ ՌԴ-ն է վճռորոշ դեր ստանձնեց Արցախում հրադադար հաստատելու հարցում, չնայած որ հետագայում եռակողմ հայտարարությունը փոխարինվեց ԱՄՆ-ի մասնակցությամբ համաձայնագրի։