Տաշիր Սամոյի կուսակցության կազմում ՔՊ-ականների մերձավորներն են

«Մեր ձևով» շարժման կամ «Ուժեղ Հայաստան» կուսակցության կազմում շարունակում են ակտիվորեն ընդգրկվել ոչ միայն անսկզբունքային ու քաղաքական հստակ կողմնորոշում չունեցող ճամբարափոխներ, այլև ՔՊ-ական դաշտից մարդիկ, ովքեր հավանաբար իրենց զգում են յուրայինների շարքում։

Այլ խոսքով՝ «Ուժեղ Հայաստան»-ում զգում են, ինչպես «Իրական Հայաստան»-ում։

NEWSPRESS.am-ի տեղեկություններով, օրինակ այդպիսի մեկն է՝ անկախ փորձագետ, բժիշկ Ծաղիկ Վարդանյանը։ Վերջինս ժամանակին զբաղեցրել է պետական առողջապահական գործակալության (ՊԱԳ) ղեկավարի պաշտոնը, 2 մեղադրանքով անցել քրեական գործով, ազատվել աշխատանքից ու 1.5 տարի տևած դատական գործընթացից հետո վերականգնվել։

Ի դեպ, ՊԱԳ-ը հենց այն մարմինն է, որը կառավարության հատկացրած գումարը բաշխում է բուժհաստատություններին։

Խղճի դեմ չմեղանչելու համար, չենք կարող ասել, որ նրան դատը շահելու հարցում օգնել են, բայց և չենք կարող չնշել, որ ՔՊ-ականների շրջանում բժիշկ Ծաղիկ Վարդանյանն ունի իր մերձավորներին։

Տիկին Վարդանյանը նաև սերտ հարաբերություններ ունի Արսեն Թորոսյանի հետ։ Ի դեպ, 2020 թվականին՝ կորոնավիրուսի շրջանում, ենթադրյալ չարաշահումների գործով հակակոռուպցիոն դատարանում քննվող գործի շրջանակում, Ծաղիկ Վարդանյանը ընդգրկված է, որպես վկա։ Իհարկե վկայի կարգավիճակը ոչ մեղադրանք է ու ոչ էլ դատավճիռ, սակայն, ինչպես ասում են, առանց կրակ ծուխ չի լինում։ 

Հարկ է նկատել նաև, որ Ծաղիկ Վարդանյանի քույրը՝ Լուսինե Վարդանյանը, երդվյալ ՔՊ-ական է։ Նա լուսանկար է հրապարակել իր էջում Նիկոլ Փաշինյանի հետ ու շնորհավորել նրա տարեդարձը՝ Փաշինյանին անվանելով «մեծարգո վարչապետ»։ Ընդ որում, վարչապետ բառն ընդգծել է՝ գրելով այն հատուկ մեծատառերով (նկարը՝ ստորև)։

Բայց սա, թերևս չարյաց փոքրագույնն է։

Տաշիր Սամոյի «ընդդիմադիր» դաշտում տաքուկ տեղավորված Ծաղիկ Վարդանյանի քույրը՝ Լուսինե Վարդանյանը, Մեղրիում  ակտիվ մասնակցել է Նիկոլ Փաշինյանի, արդեն օրինական տիկնոջ՝ Աննա Հակոբյանի «Կրթվելը նորաձև է» շարժմանը։

Դժվար է հավատալ, թե՝  քույրերը, գտնվելով քաղաքական տարբեր դաշտերում, հաշտ են իրենց շուրջը տիրող իրականության արանքում։ Իսկ եթե հաշտ են, ապա նշանակում է հասկանում են, որ «Ուժեղ Հայաստան»-ի քաղաքական ուղեծիրը համընկնում է «Իրական Հայաստան»-ի բռնած քաղաքականությանը։

Լուսանկարում՝ Լուսինե Վարդանյանն է՝ «Կրթվելը նորաձև է» շարժման ընթացքում «կրթվելիս»․

Արմինե Մկրտումյան