Տոպրակի կտոր՝ «Աթենք»-ի նագգեթսի մեջ․ «Աթենք»-ից արձագանքել են ահազանգին

Ֆեյսբուքյան օգտատերերից մեկը «Անվտանգ սնունդ» ֆեյսբուքյան էջում լուսանկար է հրապարակել և գրել, որ «Աթենք» ընկերության արտադրած նագգեթսի մեջ տոպրակի կտոր է հայտնաբերել։

Մեկնաբանություններում արձագանքել են այլ սպառողներ՝ գրելով, որ ընկերությունը սկսել է աշխատել քանակի վրա՝ երկրորդ պլան մղելով որակը և որ նույն ընկերության արտադրանքի հետ կապված իրենք էլ են խնդիրների բախվել, մասնավորապես տարբեր առարկաներ են հայտնաբերել։ Մի քանիսն էլ խորհուրդ են տվել այլ ընկերությունների արտադրանքից օգտվել։

«Աթենք» ընկերությունն արձագանքել է գրառման մեկնաբանություններում։

«Տեղի ունեցածը մեզ համար խիստ անընդունելի է։ Մեր ընկերության համար սննդի անվտանգությունը սոսկ ստանդարտ չէ, այլ բացարձակ արժեք, խորապես ցավում ենք, որ այս դեպքը ստվերել է մեր սպառողների վստահությունը։

Ցանկանում ենք տեղեկացնել Ձեզ և մեր ողջ հանրությանը, որ Ձեր ահազանգից անմիջապես հետո մեր Որակի վերահսկման բաժինը ձեռնարկել է արտադրական շղթայի ամբողջական վերստուգում։ Իրականացվում է տվյալ խմբաքանակի արտադրական շղթայի մանրակրկիտ քննություն՝ տեխնիկական թերացման ճշգրիտ պատճառը պարզելու համար։ Մենք արդեն իսկ իրականացրել ենք անձնակազմի հրահանգավորում`արտադրության յուրաքանչյուր փուլում նման դեպքերը իսպառ բացառելու համար։

Սիրելի հաճախորդներ, մենք երբեք չենք խուսափում պատասխանատվությունից և շնորհակալ ենք Ձեզ՝ մեզ ավելի լավը դառնալու հարցում օգնելու համար։ Մեր թիմի ամենօրյա աշխատանքի նպատակը մեկն է՝ մեր սեղաններին հասնի բացառապես անվտանգ և որակյալ սնունդ»։