Ոնց որ Երևանի «էլիտար» երեխաները, այնպես էլ մեր գյուղի երեխաները ասֆալտապատ ճանապարհներով պետք է գնան թոփ մակարդակի դպրոց․ Փաշինյան

Այդ թեմաներով չքմեղանալու որևէ առիթ ոչ միայն չկա, այլև ընդհակառակը, մենք պետք է ակտիվ կերպով մարդկանց ներկայացնենք, թե ինչ է կատարվում։ Այս մասին այսօր՝ մարտի 5–ին, կառավարության նիստում հայտարարեց Նիկոլ Փաշինյանը՝ անդրադառնալով հանրապետությունում բազմաթիվ դպրոցներ փակելու մեղադրանքին։

«Ես համոզված եմ, որ Երևանի աշակերտների մի զգալի մասը, որ 6, 7, 8, 9, 10, 11, 20, 30 կիլոմետր ամեն օր կտրում է, գնում է դպրոց, հետ է գալիս։ Ոչ մեկ չի բողոքում դրանից, բայց ասում են՝ գյուղի երեխաներին պահեք ցեխերի մեջ։ Ոչ, ոնց որ Երևանի «էլիտար» երեխաները, այնպես էլ մեր գյուղի երեխաները ասֆալտապատ ճանապարհներով պետք է գնան թոփ մակարդակի դպրոց, պետք է ստանան թոփ մակարդակի կրթություն, տրանսպորտին էլ կանդրադառնանք։

Տրանսպորտի հետ կապված այնտեղ ուրիշ գաղափարներ էլ կան, ծնողներից է եկել այդ առաջարկը, որ գուցե այլ մեխանիզմներ դնենք, որ ծնողները կարող են իրենք այդ հարցը լուծեն՝ մեր աջակցությամբ»,–ասաց նա։