Ոստիկանության պաշտոնյան զենք է վաճառում, հետախուզվողների թաքցնում, հովանավորում բառիկներին, հարստանում է ու թանկարժեք մեքենաներ գնում․ նրա մասին օպերները զեկուցել են «վերևներին» ու քեֆ արել

2021 թվականին Արամ Հովհաննիսյանի ղեկավարած ոստիկանությունում լավագույն օպերլիազոր ճանաչված Հրաչ Միրոյանը, ով նույն թվականին, հավանաբար, իշխանության կողմից ներդրված, ծպտված մասնակցում էր ընդդեմ Նիկոլ Փաշինյանի ցույցերին, այսօր կարծես թե թևեր է առել ու լայն հովանավորություն է վայելում ու հարստանում։ 

Բայց «լավագույն օպերլիազոր» բնութագրումն, ըստ մեր աղբյուրի, ամենևին էլ տեղին չէ այսօր, երբ Միրոյանն սկսել է հենց ինքը անօրինություններ  թույլ տալ։

Այսպես․ Միրոյանը ներկայումս զբաղեցնում է ոստիկանության Արարատի մարզային վարչության թմրամիջոցների և հետախուզվողների բաժնի պետի պաշտոնը ու ինքն է ղեկավարում օպերլիազորներին։ Հենց նրա ղեկավարած օպերներն օրերս պարզել են, որ Միրոյանն, այսպես ասած, հովանավորում է թմրամիջոցներ ապօրինի շրջանառողներին՝ բառիկներին։ Միևնույն ժամանակ, օպերները պարզել են նաև, որ Միրոյանը վաճառում է այն զենքերը, որոնք քաղաքացիներն են հանձնում ոստիկանությանը։

Մեր տեղություններով՝ օպերլիազորներն այս տեղեկությունները զեկուցել են ՔՈԳՎ Արարատի մարզային վարչության պետ Սարիբեկ Ռուստամյանին։ Վերջինս իր մոտ է կանչել Միրոյանին և հորդորել անաղմուկ ազատման դիմում դրել․ վերևներում ուզում են խուսափել ավելորդ խոսակցություններից։

Բացի այդ, ըստ նույն աղբյուրների՝ Միրոյանը հետախուզվողներին գումարի դիմաց այսպես ասած չի հայտնաբերում։ Վկա՝ Արարատում հայտնի Վիլենը, ով հետախուզման մեջ է, բայց «չի հայտնաբերվում»։ 

Բայց սրանով էլ Միրոյանի «հերոսությունները» չեն վերջանում․ նա, մեր տեղեկություններով, ինչ-որ ծառայություններ է մատուցել քրեական աշխարհում ծանրակշիռ դեր ունեցող հեղինակությունների։ 

Երեկ՝ մարտի 8-ին օպերլիազորները խորովածով նշել են, որ կարողացել են բացահայտել, թե իրականում ինչով է զբաղված եղել և ինչպես է հարստացել Միրոյանը։ Նա մի քանի թանկարժեք մեքենա է ձեռք բերել (չենք կարող պնդել, թե հենց իր անունով)։ Բոլորովին վերջերս էլ նոր Mercedes GLA է գնել։ 

Մի խոսքով՝ ոստիկանությունում հարստացած Արամ Հովհաննիսյանի սիրելին, ով իր հերթին Նիկոլ Փաշինյանի սիրելին է (Հովհաննիսյանի բիզնեսի մասին լսելուց հետո Փաշինյանի՝ թևով բզելու տեսարանը դեռ թարմ է, ընթերցողը կհիշի), «ըստ արժանվույն» շարունակում է իր նախկին ղեկավարի «սուրբ» գործը՝ ամեն գնով հարստանալը։ 

NEWSPRESS.am-ի տեղեկություններով՝ Միրոյանի հարցն այժմ գտնվում է ոստիկանության Ներքին անվտանգության վարչությունում՝ ՆԱՎ-ում։

Փաշինյանի կողմից ցույցերում ներդրվելն ու Հովհաննիսյանի կողմից պարգևատրումները կօգնե՞ն Միրոյանին մնալ յուղոտ պաշտոնին, թե՞ նախընտրական շրջանում կգերադասեն ազատվել ներքին մի թույլ, բայց կեղտոտ օղակից, ցույց կտա ժամանակը, բայց մենք անպայման կշարունակենք հետևել աղմկոտ իրադարձությանը։