ՀՀ նախագահությամբ ՄԱԿ-ում ձևավորվել է թմրամիջոցների վերահսկման բարելավմանն ուղղված ​​խումբ

Մարտի 13-ին ՄԱԿ-ի Թմրամիջոցների հարցերով հանձնաժողովի 69-րդ նստաշրջանը հաջողությամբ ավարտել է իր աշխատանքները՝ Վիեննայի միջազգային կազմակերպություններում ՀՀ մշտական ներկայացուցիչ, դեսպան Անդրանիկ Հովհաննիսյանի նախագահությամբ։

Դեսպան Անդրանիկ Հովհաննիսյանն իր ելույթում երախտագիտություն է հայտնել Հայաստանին և իրեն ընձեռված վստահության համար՝ համոզմունք հայտնելով, որ նման պատասխանատու հանձնառությունը ևս մեկ անգամ ապացուցում է Հայաստանի անսասան նվիրվածությունը ամուր բազմակողմ դիվանագիտության համակարգի և միջազգային համագործակցության նկատմամբ։

Հնգօրյա նստաշրջանը կարևոր հանգրվան է հանդիսացել թմրամիջոցների համաշխարհային խնդրի հասցեագրմանն ուղղված լուծումների և միջազգային համագործակցության ընդլայնման համար։

Հայաստանի նախագահությամբ ձևավորվեց նոր՝ բազմաոլորտ անկախ փորձագիտական ​​խումբ, որի առաքելությունն է պատրաստել առաջարկությունների փաթեթ՝ ուղղված թմրամիջոցների վերահսկման միջազգային կոնվենցիաների և այլ համապատասխան միջազգային պարտավորությունների կատարման բարելավմանը՝ նպատակ ունենալով նպաստել Հանձնաժողովի կողմից 2029թ. անցկացվելիք գլոբալ վերանայմանը։

Հանձնաժողովի կողմից ընդունվել են թվով հինգ բանաձևեր, որոնց նպատակն է, մասնավորապես, խթանել ջանքերը սինթետիկ թմրամիջոցների և պրեկուրսորների վաղ կանխարգելման և վերահսկողության մեխանիզմների կատարելագործման, ինչպես նաև դրանց արտադրության և շրջանառության համար սարքավորումների և մատակարարման շղթաների ապօրինի շահագործման կանխարգելման ուղղությամբ, ամրապնդել հանրային առողջապահության համակարգի արձագանքները և այլընտրանքային զարգացման ծրագրերը։

Հնգօրյա նստաշրջանին մասնակցել են ավելի քան 2000 պատվիրակներ՝ շուրջ 130 անդամ պետություններից, մոտ երկու հարյուր միջազգային, տարածաշրջանային և հասարակական կազմակերպություններից։

Նստաշրջանին ելույթով հանդես է եկել Կոլումբիայի նախագահ Գուստավո Պիետրոն։ Մի շարք պատվիրակություններ ղեկավարվում էին նախարարի կամ նախարարի տեղակալի մակարդակով։

Նստաշրջանի ընթացքում կազմակերպվել է շուրջ 170 հարակից միջոցառում և 24 ցուցահանդես։

Ծանոթագրություն. Հայաստանը ՄԱԿ-ի Թմրամիջոցների հարցերով հանձնաժողովին առաջին անգամ անդամակցել է 2024թ.: Հայաստանը Հանձնաժողովը նախագահելու է 2026 թ. ընթացքում։